Batys Qazaqstan oblysynda 18 jasqa tolǵan jastar daýys berdi
ORAL. KAZINFORM – Batys Qazaqstan oblysynda saılaýǵa kelgen halyqtyń nópiri qalyń. Óńir turǵyndary mańyzdy kúnnen qalys qalmaı, óz tańdaýlaryn jasaýǵa asyǵýda.
Búgin el bolashaǵyna alańdaýly jastar saılaý ýchaskelerinen tabyldy. Olar Táýelsiz Qazaqstan úshin árbir azamattyń naýqanda tańdaý jasaýy mańyzdy dep esepteıdi. Solardyń biri – Aqnur Dosqalı. Ol – Jahansha Dosmuhammedov atyndaǵy pedagogıkalyq kolledjdiń І kýrs stýdenti.
Aqnur Qazaqstan Respýblıkasynyń azamaty retinde eliniń bolashaǵy úshin referendýmǵa daýys berýge kelgenin aıtady.
– Men búgin óz tańdaýymdy jasadym. Muny elimizdiń damýyna qosqan úlesim dep sanaımyn. Elimizdiń bolashaǵy jastar ekenin árqashan qaperimde ustaımyn. Jas urpaq AES-tiń energetıkalyq áleýetin paıdalana otyryp, keleshekte memleketimizdiń jetistikterin eseleı túsedi. Demek, AES jobasyn júzege asyrý elimizdiń óskeleń urpaǵy úshin mańyzdy, - deıdi Aqnur Dosqalı.
Sondaı-aq ol elimizdiń mańyzdy saıası naýqanyna jaýapkershilikpen qaraıtyny jaıynda aıtty. Sonymen qatar Aqnur alǵash ret saılaý bıýlletenin alyp qana qoımaı, estelik syılyqqa ıe boldy.
Aıta ketý kerek, Batys Qazaqstan oblysynda referendýmǵa daýys berý jalǵasyp jatyr. Sonymen qatar daýys berý quqyǵy bar árbir azamat referendum2024.gov.kz saıtynan óziniń saılaý ýchaskesin bile alady.
