Batys Qazaqstan oblysynda 14 adamdy qaraqurt shaqqan

ORAL. KAZINFORM — Batys Qazaqstan oblysynda bıylǵy jeti aıda qaraqurt shaqqan 14 adamǵa medıtsınalyq kómek kórsetildi.

BQO densaýlyq saqtaý basqarmasynan túsken málimetke qaraǵanda, olardyń bári de emdelip shyqty. Sonyń ishinde eki derek Syrym aýdanynda tirkeldi. 
Mamandardyń aıtýynsha, qaraqurt shaǵyp alsa, dereý medıtsınalyq kómekke júginý kerek. Ýdy óz betinshe syǵýǵa tyrysýdyń qajeti joq.

Qaraqurt shaǵýyn emdeý hattamasy:
1. Alǵashqy kómek:
— Tistegen jerdi sabynmen jýý;
— Jarany antıseptıkpen óńdeý;
-Ýdyń sińýin baıaýlatý úshin tistegen jerge salqyn basý (kompress, muz).
2. Medıtsınalyq kómek:
— Qaraqurtqa qarsy sarysýdy engizý: bul ýdy beıtaraptandyrýǵa baǵyttalǵan negizgi emdeý ádisi;
— Sımptomatıkalyq em:
Aýyrsynýdy basatyn dárilik zattar.
Detoksıkatsııa terapııasy: aǵzadan ýdy ketirýge baǵyttalǵan em;
Infýzııalyq terapııa: sý-elektrolıt balansyn saqtaý úshin arnalǵan em;
Aýyr jaǵdaılarda kortıkosteroıdtardy qoldanýǵa týra keledi.

BQO densaýlyq saqtaý basqarmasynyń málimetinshe, shuǵyl túrde medıtsınalyq kómek kórsetetin statsıonarlar qaraqurt ýyna qarsy sarysýmen qamtylǵan.
Syrym aýdany Jympıty aýylynyń turǵyny Kemel Essultanov qaraqurt shaǵyp ala ma dep qaýiptenetinin jetkizdi.

Onyń sózine qaraǵanda, osynyń aldynda aýdanda eki ózbekstandyq azamatty qaraqurt shaǵyp, olardy emdeý úshin qalaǵa alyp ketken. 

Aýyl turǵyny qaraqurt basqa jaqtan ákelinetin tas sııaqty qurylys materıaldarymen birge keledi dep topshylaıdy. Óıtkeni ózi beınejazbaǵa túsirip alǵan qaraqurt tastyń arasynan shyqqan. 

— Qazir aýlada úı salyp jatyrmyz. Ár tasty muqııat qaraýǵa týra keledi. Jaz mezgili bolǵan soń jeńil aıaqkıimmen júremiz. Qolǵa bııalaı, ústimizge arnaıy kıim, sosyn jabyq aıaqkıim kııý kerek shyǵar. Ásirese, balalardy shaǵyp ala ma dep qorqamyz. Ulym kishkentaı, qolymen ustap qaraǵan, qaraqurttyń ne ekenin bilmeıdi ǵoı. Sondyqtan qaýiptiń aldyn alyp, aýyldy túgel buqyrlaý jáne balalar arasynda túsindirý jumystary júrgizilse, durys bolar edi. Biletinder osy ýaqyt qaraqurttyń kóbeıetin kezi deıdi. Kózin joımasaq, ósip ketý qaýpi bar, — dedi Kemel Essultanov.

Eske sala keteıik, budan buryn Batys Qazaqstanda kómilgen sibir jarasy oshaǵynan qaýip bar ma, sony jazǵan edik.