Batys Qazaqstan oblysyna qandastardyń kópshiligi Reseıden kóship kelgen

ORAL. KAZINFORM – Batys Qazaqstan oblysyna sońǵy úsh jylda 345 qandas qonys aýdarǵan.

BQO jumyspen qamtýdy úılestirý jáne áleýmettik baǵdarlamasynan túsken málimetke qaraǵanda, qandastar Reseı, sondaı-aq Ózbekstan, Túrkmenstan, Qyrǵyzstan, Tájikstan jáne Ázerbaıjannan kóship kelgen. 

2023 jyly 184 adam oblysqa ornalassa, sonyń 134-iniń turaqty jumysy bar. 50-i joǵary bilimdi bolsa, 84-i arnaýly orta oqý ornyn bitirgen. 

2024 jyly kelgen 126 qandastyń 90-y turaqty jumys ornyn tapqan. 34-i joǵary, 56-sy arnaýly orta bilimdi meńgergen. 

- Bıyl 1 qyrkúıekke deıin 35 adam qonystansa, sonyń 23-i turaqty jumys isteıdi. Beseýiniń joǵary, 18-i arnaýly orta bilimi bar. Bulardyń arasynda 17 er, 18-i áıel adam, 8-i – zeınetker, tórteýi – bala. Olardyń 24-i Reseıden, jeteýi Ózbekstannan, Túrkmenstan, Iran, Iordanııa men Mysyrdan bir-bir adamnan qonys aýdarǵan, - dep habarlady vedomstvodan. 

BQO statıstıka departamentiniń 1 tamyzdaǵy málimeti boıynsha oblys halqy 695,9 myń bolsa, sonyń 400,3 myńy nemese 57,5 paıyzy – qala, 295,6 myńy (42,5 paıyzy) – aýyl turǵyndary.

Eske sala keteıik, budan buryn Batys Qazaqstanda 700-den astam jastyń ásker qataryn tolyqtyratynyn jazǵan edik.