BQO sheteldik ınvestıtsııa tartý baǵytyndaǵy múmkindikterin tanystyrdy
ORAL. KAZINFORM — Oblys ákimi Narıman Tóreǵalıev Eýropalyq Odaqtyń Qazaqstandaǵy Elshisi Aleshka Sımkıch bastap kelgen mártebeli meımandarmen kezdesti. Resmı delegatsııa quramynda Avstrııa, Belgııa, Kıpr, Fınlıandııa, Frantsııa, Latvııa, Lıtva, Portýgalııa, Serbııa, Ispanııa, Kanada memleketteriniń elshileri jáne Estonııa, Polsha, Shveıtsarııa elderiniń ýaqytsha senimdi ókilderi bar.
Eýroodaqqa múshe emes memleketter ókilderiniń de qatysýy halyqaralyq yntymaqtastyqtyń aýqymyn keńeıtip, mańyzyn arttyra tústi. Basty maqsat — aradaǵy alys-beris, barys-kelisti arttyrý.
Aımaq basshysy elshilerdiń Jaıyq jerine resmı sapary Batys Qazaqstan oblysy men Eýroodaq elderi arasyndaǵy yntymaqtastyqty jańa deńgeıge kóteretinine senim bildirdi.
— Kúni keshe Brıýsselde ótken alqaly jıynda Memleket basshysy Qasym-Jomart Kemeluly Toqaev sóz sóılep, Qazaqstan men Eýropalyq Odaq arasyndaǵy qarym-qatynas shynaıy strategııalyq sıpatqa ıe bolǵanyn atap ótti. Prezıdent tapsyrmasyna sáıkes tikeleı sheteldik ınvestıtsııa tartý baǵytynda bizdiń aımaqta da aýqymdy jumystar atqaryldy. Batys Qazaqstan oblysy Bolgarııa, Vengrııa, Italııa, Germanııa, Ulybrıtanııa, Nıderland Koroldigi, Qytaı jáne Koreıa Respýblıkasy sııaqty eldermen tyǵyz baılanys ornatty. 2025 jyldyń qorytyndysy boıynsha óńirimizdiń Eýropalyq Odaq elderimen taýar aınalymy 5 mlrd dollardan asty, — dedi Narıman Tóreǵalıev.
Eýropalyq Odaqtyń Qazaqstandaǵy Elshisi Aleshka Sımkıch memleketter basshylary deńgeıindegi kelissózder aıasynda ekonomıkalyq yqpaldastyqty odan ári arttyrýdyń mańyzyn atap ótti.
— Eýropalyq Odaq Qazaqstannyń eń iri saýda jáne ınvestıtsııalyq seriktesi sanalady. Biz bul baǵyttardaǵy baılanysty bekemdeýge múddelimiz. Óńirlerge sapardyń maqsaty da osy. 1 shildede jańa Konstıtýtsııa kúshine enedi. Tamyz aıynda Quryltaı saılaýy ótedi. Biz Qazaqstandaǵy barlyq saıası ózgeristerge mán berip, jańa damý kezeńine kýá bolyp otyrmyz, — dedi Aleshka Sımkıch.
Elshiler óńirdiń negizgi erekshelikteri men ınvestorlardy qoldaý sharalary týraly suraqtar qoıyp, ózara pikir alysty.
Aıta keteıik, bıyl óńirge 1 trln teńgeden astam ınvestıtsııa tartý josparlanyp otyr.
