Batys Qazaqstan oblysy Qorjyn aýylynda úıler sý astynda qaldy

ORAL. KAZINFORM — Batys Qazaqstan oblysy Qaratóbe aýdany Aqqozy aýyldyq okrýginiń ortalyǵy Qorjyn aýylynda kúrdeli jaǵdaı bolyp otyr.

BQO ákiminiń orynbasary Qalııar Aıtmuhambetovtiń málim etkenindeı, atalǵan aýylda 130-daı úıde 600-deı turǵyn turady.

«Qazir turǵyndar mektep ǵımaratyna kóshirilip, shuǵyl kómek kórsetilip jatyr. Budan bólek, oblysta 70 úıge sý kirdi. Atap aıtqanda, Oral qalasynda 19, Báıterek aýdanynda Peremetnyı, Volodar, Darııan aýyldarynda 10, Tasqala aýdany Mereı aýylynda 4, Terekti aýdanynda Ańqatyda 16, Podstepnyıda 17, Terektide 2, Uzynkólde 2 úı sýǵa ketti. Oǵan qosa Oralda 17 áleýmettik nysan, 5 kópqabatty úı, Báıterekte 2, Terektide 2 áleýmettik nysannyń jertólelerine sý kirdi. Áıtse de, bul sońǵy málimet emes. Aqparat sát saıyn ózgerip jatyr. Onyń ústine birqatar ózende sý deńgeıi kóterilý ústinde. Qysqasy, qaýip seıilmeı tur. Oblysta sý tasqynyna qarsy kúres jalǵasýda», - dedi Qalııar Shadııaruly.

BQO TJ departamenti baspasóz qyzmetiniń naqtylaýynsha, Qaratóbe aýdany Qorjyn aýylynda qardyń kúrt erip, jańbyr jaýýy saldarynan Jaqsybaı ózeni arnasynan asyp, 80 jeke turǵyn úı sý astynda qaldy. Shamamen 300-400-ge jýyq adam aýyl mektebine kóshirildi. Avtokólik qozǵalysy toqtatyldy.

Eske sala keteıik, budan buryn Oral qalasy ákimine qatań sógis jarııalanǵanyn jazǵan bolatynbyz.

Sondaı-aq Batys Qazaqstannyń Ańqaty aýylynda 16 úıge sý kirdi.

Batys Qazaqstanda Samara-Shymkent jolynyń eki ýchaskesin sý basyp ketti.