Batys Qazaqstan aýyldarynda 151 quqyq kabıneti jumys isteıdi

ORAL. KAZINFORM — Batys Qazaqstan oblysynda turǵyndardyń quqyqtyq saýattylyǵyn arttyrý maqsatynda túsindirý jumystary turaqty júrgizilip keledi. 

BQO ádilet departamentiniń basshysy Álııa Tasybaevanyń óńirlik kommýnıkatsııalar qyzmeti alańynda ótken brıfıngte málim etkenindeı, bıylǵy birinshi jartyjyldyqta «Ádilet keńes beredi», «Halyq zańgeri», «Ashyq esik kúni» aktsııalary boıynsha 10 is-shara ótkizildi.

Álııa Ánesqyzynyń sózine qaraǵanda, oǵan qosa 623 konsýltatıvtik-túsindirý is-sharasy 83 439 adamdy qamtydy.

— Aýyl turǵyndarynyń quqyqtyq saýattylyǵyn arttyrý úshin 151 quqyq kabıneti ashyldy. Kabınetter aýdandyq, aýyldyq mádenıet úılerinde, demalys ortalyqtarynda jáne basqa oryndarda «Egov» buryshtarynyń bazasynda jumys isteıdi. 151 aýyldyq okrýgtiń barlyǵynda ınternetke qoljetimdi kompıýterler ornatylyp, ózine-ózi qyzmet kórsetý buryshy jasaldy. Kabınetterde qoldanystaǵy normatıvtik-quqyqtyq aktilermen tanysý úshin «Ádilet» aqparattyq-quqyqtyq júıesi, «Zań» derekter bazasy, sondaı-aq aqparattyq júıelerge (e-otinish, «Ashyq NQA» portaly jáne basqa) qoljetimdilikpen tolyq qamtamasyz etilgen, — dedi Álııa Tasybaeva.

Onyń aıtýynsha, quqyq kabınetteriniń jumysyn baqylaýmen jergilikti ákimdikter aınalysady. Sonymen qatar ádilet departamenti monıtorıngileý isin júrgizip otyrady.

Ádilet mınıstrliginiń resmı qujattardy shetelde tanýdy jeńildetý jáne jedeldetý maqsatynda elektrondy apostıl qyzmetin iske qosqany belgili.

— Endi azamattar men zańdy tulǵalar apostıldi qashyqtan, onlaın túrde rásimdeı alady. Qyzmet elektrondy úkimet portaly — www.egov.kz arqyly elektrondyq tsıfrlyq qoltańbany (ETsQ) paıdalaný arqyly kórsetiledi. Buryn apostıl 10-15 jumys kúnine deıingi merzimde alynsa, qazir oǵan bir táýlik ishinde qol jetkizýge bolady. Bul jóninde turǵyndar jumys ýaqytynda halyqqa qyzmet kórsetý ortalyqtaryna júginse, sonymen qatar qyzmet táýlik boıy onlaın qoljetimdi. Bul qujattardy shetelde zańdastyrý protsesin aıtarlyqtaı jeńildetip, adamardyń ýaqytyn únemdep, qaǵazbastylyqty azaıtady. Sondaı-aq elektrondy qujat qaǵaz apostılmen teń zańdy kúshke ıe, — dedi departament basshysy.

Eske sala keteıik, budan buryn elektrondy apostılge baılanysty Qazaqstan qujattary 90 elde jaramdy bolatynyn jazǵan edik.