«Batys Fılıppın teńizi» Google kartasyna engizildi
ASTANA. KAZINFORM — Google Maps buǵan deıin «Ońtústik Qytaı teńizi» atalyp kelgen sý aıdynynyń bir bóligin endi «Batys Fılıppın teńizi» dep kórsete bastady.
Lianhe Zaobao basylymynyń habarlaýynsha, Fılıppın Parlamenti Ókilder palatasynyń spıkeri Martın Romýaldes 15 sáýir kúni Google kartasynda eldiń batysyndaǵy teńiz aıdynynyń «Batys Fılıppın teńizi» dep belgilene bastaǵanyn málimdedi. Ol syrt kózge eleýsiz bolyp kórinetin bul ózgeristiń shyn máninde halyqaralyq qaýymdastyqtyń atalǵan teńiz aıdynyn «Fılıppınge táýeldi ekonomıkalyq aımaqtyń bir bóligi retinde moıyndaı bastaǵanyn bildiredi» dep atady.
— Mıllıardtaǵan halyq qoldanatyn Google kartasynda Batys Fılıppın teńiziniń durys ári birińǵaı belgilenýi — fılıppındikter úshin mańyzdy ári súıinishti jańalyq, — dedi spıker.
Onyń atap ótýinshe, bul Fılıppınniń aıryqsha ekonomıkalyq aımaqtaǵy sý aıdynyna qatysty egemendik quqyǵynyń halyqaralyq qaýymdastyq tarapynan moıyndala bastaǵanyn bildiredi.
— Bul bizdiń kelesi dáıekti ustanymymyzdy qýattaı túsedi: atalǵan teńiz aıdyny — Fılıppın aýmaǵynyń ajyramas bóligi; álemniń barlyq eli bizdiń egemendik quqyǵymyzdy qurmetteýge tıis, — dedi Romýaldes.
Romýaldestiń osy málimdemesi jarııalanǵanǵa deıin-aq aqparat kózderi Google kartasynda Fılıppın araldarynyń batysyndaǵy teńiz aıdynynyń ataýy jańartylǵanyn baıqap úlgergen. Buǵan deıin bul aımaq «Ońtústik Qytaı teńizi» dep kórsetilse, endi «Batys Fılıppın teńizi» bolyp tur.
Osy máselege oraı, Qytaı Syrtqy ister mınıstrliginiń resmı ókili Lın Tszıan 15 sáýir kúni ótken baspasóz máslıhatynda pikir bildirdi.
— Ońtústik Qytaı teńizi — halyqaralyq qaýymdastyq uzaq ýaqyttan beri paıdalanyp kele jatqan jáne jalpyǵa ortaq geografııalyq ataý. Bul ataý álem elderi men BUU sııaqty halyqaralyq uıymdar tarapynan jappaı moıyndalǵan, — dep qysqa qaıyrdy Lın Tszıan.
Buǵan deıin Qytaıdyń Harbın qalalyq Qoǵamdyq qaýipsizdik basqarmasynyń kıbershabýyl uıymdastyrý men qupııa aqparattardy urlaýǵa qatysy bar degen kúdikpen AQSh-tyń arnaıy agentterine izdeý jarııalaǵanyn jazǵan edik.