Batys Eýropa – Batys Qytaı dáliziniń boıynda logıstıkalyq keshen salynady

ASTANA. KAZINFORM – Úkimet otyrysynda Saýda jáne ıntegratsııa mınıstri Arman Shaqqalıev Batys Eýropa – Batys Qytaı dáliziniń boıynda salynatyn saýda-logıstıkalyq keshen qashan iske qosylatynyn aıtty.

— Indýstrııalyq saýda-logıstıkalyq keshenniń ornalasý orny retinde Qazaqstan jaǵyndaǵy «Qarasý» ótkizý pýnkti men Qyrǵyzstan jaǵyndaǵy «Aq-Tilek» pýnktteriniń mańaıy tańdaldy. Bul Qyrǵyzstanmen eń qarqyndy tranzıttik pýnktterdiń biri. Keshen «Almaty — Bishkek» baǵytynyń boıynda ornalasady, bul halyqaralyq «Batys Eýropa — Batys Qytaı» avtojoly dáliziniń bir bóligi. Indýstrııalyq saýda-logıstıkalyq keshen qyzmetterdi saqtaý, taýarlardy aldyn ala satý úshin daıyndaý, konsolıdatsııalaý jáne kóterme partııalar boıynsha qaıta bólý qyzmetterin usynady, — dedi mınıstr.

Aıtýynsha, qazir atalmysh keshen arqyly jumys isteıtin rezıdentter iriktelip jatyr. 

— Ol pýlǵa aýyl sharýashylyǵy, tamaq ónerkásibi, kóterme jáne bólshek saýda salasyndaǵy kompanııalar kiredi. Keshen aýmaǵynda jeńildetilgen shekaralyq júıe men avtokólik quraldary men júkterdi tirkeý júıesi jumys isteıtin bolady, al taýarlar jańa kópir arqyly tasymaldanady, bul qoldanystaǵy ótkizý pýnktterindegi júktemeni aıtarlyqtaı jeńildetýge múmkindik beredi. Jambyl oblysy ákimdigi men Kólik mınıstrligi 2025 jyly kópir salý boıynsha tıisti sharalar qabyldaýy qajet. Keshendi 2026 jylǵa deıin iske qosý josparlanýda, — dedi Arman Shaqqalıev.