Batys elderiniń kóshbasshylary AQSh pen Iran arasyndaǵy atysty toqtatýdy quptady
ASTANA. KAZINFORM - Eýropanyń jetekshi memleketteri, Kanada jáne Eýropalyq odaq basshylyǵy AQSh pen Iran arasyndaǵy eki aptalyq bitimge baılanysty birlesken málimdeme jasady, dep habarlaıdy Kazinform agenttiginiń Eýroodaqtaǵy menshikti tilshisi.
Qujatqa Frantsııa, Italııa, Germanııa, Ulybrıtanııa, Kanada, Nıderland, Danııa, Ispanııa elderiniń basshylary, sondaı-aq Eýrokomıssııa men Eýroodaq keńesiniń prezıdentteri qol qoıǵan. Málimdemede dıplomatııalyq úderiske nyq qoldaý bildirilgen.
Qujat mátininde eki aptalyq atysty toqtatý jaqyn kúnderi soǵysty tolyq ári túpkilikti aıaqtaýǵa múmkindik beretin qadam retinde baǵalanǵan.
-Buǵan tek dıplomatııalyq jolmen ǵana qol jetkizýge bolady, — delingen málimdemede.
Batys lıderleri kelisimge qol jetkizýde Pákistannyń deldal retindegi erekshe rólin atap ótti.
-Biz búgin AQSh pen Iran arasynda jasalǵan eki aptalyq bitimdi quptaımyz. Osy mańyzdy kelisimge qol jetkizýge yqpal etken Pákistanǵa jáne barlyq seriktesterge alǵys bildiremiz. Biz taraptardy kelissózder arqyly mazmundy retteýge tezirek kóshýge shaqyramyz. Bul Irandaǵy beıbit turǵyndardy qorǵaý jáne óńirdegi qaýipsizdikti qamtamasyz etý úshin sheshýshi mánge ıe. Sondaı-aq bul jahandyq energetıkalyq daǵdarystyń aldyn alýǵa múmkindik beredi.
Biz bul dıplomatııalyq kúsh-jigerdi qoldaımyz. Osy maqsatta AQSh jáne basqa da seriktestermen tyǵyz baılanystamyz. Barlyq taraptardy, sonyń ishinde Lıvandy da, atysty toqtatý rejımin saqtaýǵa shaqyramyz. Bizdiń úkimetter Ormýz buǵazy arqyly keme qatynasynyń erkindigin qamtamasyz etýge óz úlesin qosady, — dep kórsetilgen qujatta.
Osyǵan deıin Tramptyń Irannyń energetıkalyq ınfraqurylymyna soqqy jasaýdy eki aptaǵa shegergeni týraly jazdyq.
