Batys aımaqtaǵy elektr jelisi Biryńǵaı elektrenergetıkalyq júıemen birigýi kerek – Toqaev

ASTANA. KAZINFORM – Gaz salasyn damytý eldiń ornyqty áleýmettik-ekonomıkalyq órleýiniń negizgi faktoryna aınalyp keledi. Bul týraly Prezıdent Qasym-Jomart Toqaev Úkimettiń keńeıtilgen otyrysynda aıtty.

− Úkimet 2027 jyly Batys aımaqtaǵy elektr jelisin elimizdiń Biryńǵaı elektrenergetıkalyq júıesimen biriktirýi kerek. Sondaı-aq Ońtústik aımaqtaǵy elektr jelilerin kúsheıtý jobasyn jedeldetken jón. Ońtústik óńirlerdegi energııa tapshylyǵyn joıý úshin «jasyl» energetıka salasynda iri jobalar men bý-gaz qondyrǵylary iske qosyldy. Sondyqtan 2026 jyly «Beıneý – Bozoı – Shymkent» gaz qubyryna qarasty ekinshi tarmaqtyń alǵashqy kezeńin aıaqtaýymyz kerek, − dedi Memleket basshysy.

Jalpy gaz salasyn damytý eldiń ornyqty áleýmettik-ekonomıkalyq órleýiniń negizgi faktoryna aınalyp keledi. Byltyr 9 óńirdegi 107 eldi mekenge gaz jetkizilip, 300 myń halyqtyń turmysy jeńildegen.

− «Shevron» korporatsııasymen birge jańa gaz kenishterin ıgerý jumystary bastalyp, Aqtóbe oblysyndaǵy Jálibek ýchaskesin geologııalyq barlaý jóninde yntymaqtastyq ornady. Alaıda Jańaózen men Qashaǵandaǵy gaz óńdeý zaýyttarynyń, sondaı-aq Túrkistan oblysyndaǵy bý-gaz qondyrǵysy bazasynda jumys isteıtin elektr stansasynyń qurylysy oıdaǵydaı júrip jatqan joq. Atalǵan jobalar mejeli merzimde aıaqtalýǵa tıis, − dedi Qasym-Jomart Toqaev.

Eske salsaq, Memleket basshysy aýyldyq aımaqtardy damytýǵa arnalǵan qoldaýdy bir baǵdarlamaǵa biriktirý kerektigi týraly aıtqan edi.