Batys Altaıda tabıǵattyń ózgerýi qalaı zertteledi
ASTANA. KAZINFORM — Batys Altaı memlekettik tabıǵı qoryǵynda tabıǵattaǵy ózgerister kún saıyn ǵylymı turǵyda baqylanady. Mamandar meteorologııalyq kórsetkishterdi tirkep, ósimdikterdiń maýsymdyq ózgeristerin zertteıdi jáne orman ekojúıeleriniń jaı-kúıin turaqty baqylaýda ustaıdy. Bul týraly Ekologııa mınıstrligi málim etti.
Batys Altaı memlekettik tabıǵı qoryǵynda ǵylymı monıtorıng — tabıǵatty qorǵaý jumysynyń mańyzdy baǵyttarynyń biri. Munda kún saıyn meteostantsııada aýa temperatýrasy men ylǵaldylyǵy, atmosferalyq qysym, jeldiń jyldamdyǵy men baǵyty, jaýyn-shashyn mólsheri jáne basqa da kórsetkishter tirkeledi.
— Mamandar jınalǵan derekterdi óńdep, taldap, kópjyldyq baqylaýlarmen salystyrady. Osy arqyly qoryq aýmaǵyndaǵy klımattyq jaǵdaıdyń ózgerýin baqylaýǵa múmkindik týady, — delingen habarlamada.
Baqylaý fenologııalyq alańdarda da turaqty júrgiziledi. Mamandar ósimdikterdiń japyraq jaıýy men gúldeý merzimin, jemisteriniń pisýin, ósimdik jamylǵysynyń kúıin jáne tabıǵattaǵy ózge de maýsymdyq qubylystardy tirkeıdi. Jyl saıyn jınalatyn bul málimetter tabıǵattyń maýsymdyq damý erekshelikterin baqylaýǵa jáne ár jyldaǵy ózgeristerdi salystyrýǵa múmkindik beredi.
Ǵylymı monıtorıngtiń taǵy bir baǵyty — orman ekojúıeleriniń jaı-kúıin baqylaý. Turaqty synaq alańdarynda ınjener-orman patology aǵashtardyń jaǵdaıyn zerttep, zaqymdaný deńgeıin baǵalaıdy, aýrýlar men zııankesterdiń taralýyn baqylaıdy. Mundaı turaqty baqylaý orman qaýymdastyqtaryndaǵy ózgeristerdi der kezinde anyqtap, zııankes jándikter sanynyń kóbeıý dınamıkasyn qadaǵalaýǵa múmkindik beredi.
Eske sala keteıki, Kólsaı ulttyq parkinde qońyr aıý baıqalǵan bolatyn.
Al Marqakólde qustardy sanap júrgen mamandar aıýdy kezdestirip qalǵan bolatyn.
