Batyrhan Tóleýǵalı men Nazym Mahmýtova Lahordaǵy Prezıdent kýbogy týrnırinde top jardy
ASTANA.KAZINFORM - Pákistannyń Lahor qalasynda ótip jatqan taekvondodan G-3 sanatyna jatatyn dástúrli World Taekwondo Prezıdenti kýbogynda Qazaqstan komandasynyń qorjynyna 2 altyn medal tústi, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Nazym Mahmýtova jartylaı fınalda Ońtústik Koreıa ókili Oh Sengıýdi (2:0), fınalda Saýd Arabııasynyń sportshysy Saber Dýnıa Býshýaıbtan basym túsip, -73 kg salmaqta altynnan alqa taqty.
Al otandasymyz Batyrhan Tóleýǵalı (-87 kg) fınalda Ózbekstan sportshysy Edgorbek Djýraboevty utyp, jeńimpaz atandy. Batyrhan búgin jarys barysynda Ońtústik Koreıa, Taıland pen Ózbekstan ókilinen basym tústi.
Aıta keteıik, osyǵan deıin Ulttyq qurama enshisinde 3 qola medal bolǵan. Búgin Qazaqstan jarysty 2 altyn, 3 qola júldemen aıaqtady. Bıyl dodaǵa álemniń 49 elinen 427 sportshy qatysty.
Aıta keteıik, Bekasyl Asambek erkin kúresten U20 álem chempıonatynyń jartylaı fınalyna shyqty.
