Batyr Júkembaev álemniń eks-chempıonymen aıqas aldynda salmaq ólsheý rásimin ótkizdi

AQSh-tyń Florıda shtatyndaǵy Plant-Sıtı qalasynda negizgi jekpe-jegi qazaqstandyq boksshy Batyr Júkembaev (21-1, 16 KO) pen frantsýz Mohamed Mımýn (23-5, 4 KO) arasynda ótetin boks keshiniń salmaq ólsheý rásimi ótti. Kazinform bul týraly Sports.kz-ke silteme jasap habarlaıdy.

Jekpe-jek aldynda eki boksshynyń da salmaǵy birinshi jartylaı orta salmaq shekteýi – 63,5 keli/140 fýntty kórsetti. Aldaǵy aıqas toǵyz raýndqa josparlanǵan.

Batyr Júkembaev óziniń keıingi jekpe-jegin qyrkúıekte argentınalyq boksshy Ýgo Roldanaǵa (22-2-1, 7 KO) qarsy ótkizip, tóreshilerdiń aralas sheshimimen jeńiske jetken. Sondaı-aq birinshi ortasha dıvızıondaǵy WBA Continental North Americas aımaqtyq tıtýlyn ıelendi.

Mohamed Mımýnǵa keler bolsaq, ol shildede amerıkalyq Stıven Galeanony (12-1, 9 KO) altynshy raýndta nokaýtqa jibergen bolatyn. Buryn frantsýzdyq boksshy birinshi jartylaı orta salmaqta IBO nusqasy boıynsha álem chempıony bolǵanyn aıta keteıik.