«Batyr Ana», «Ana dańqy» ordenimen nagradtalǵan analar qansha járdemaqy alady
ASTANA. KAZINFORM — Jyl basynan bastap kópbalaly otbasylar men nagradtalǵan analar 150 mlrd teńgeden astam somaǵa járdemaqy aldy. Bul týraly Eńbek jáne halyqty áleýmettik qorǵaý mınıstrliginyń baspasóz qyzmeti habarlady.
— Jyl basynan bastap kópbalaly otbasylarǵa jáne nagradtalǵan analarǵa beriletin memlekettik járdemaqylarmen orta eseppen 851,4 myń otbasy jalpy somasy 150,9 mlrd teńge mólsherinde, onyń ishinde: kópbalaly otbasylarǵa beriletin járdemaqymen — 609,5 myń otbasy 131,5 mlrd teńgege; nagradtalǵan anaǵa beriletin járdemaqymen — 241,9 myń adam 19,4 mlrd teńgege qamtyldy, — delingen Eńbekmeni habarlamasynda.
2025 jyldyń naýryz aıynda joǵaryda atalǵan járdemaqylarmen 857 myń otbasy jalpy somasy 51,1 mlrd teńge mólsherinde, onyń ishinde: kópbalaly otbasylarǵa beriletin járdemaqymen 614,8 myń otbasy 44,6 mlrd teńgege; nagradtalǵan anaǵa beriletin járdemaqymen 242,2 myń adamǵa 6,5 mlrd teńge mólsherinde qamtyldy.
Kópbalaly otbasyǵa beriletin memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.
Tólem mólsheri bala sanyna qaraı eseptelip tólenedi jáne 2025 jyly:
— 4 balasy bar otbasylarǵa — 16,03 AEK nemese 63 030 teńge;
— 5 balaǵa — 20,04 AEK nemese 78 798 teńge;
— 6 balaǵa — 24,05 AEK nemese 94 565 teńge;
— 7 balaǵa — 28,06 AEK nemese 110 332 teńge;
— 8 jáne odan da kóp balasy bar otbasylarǵa — ár balaǵa 4 AEK nemese 15 728 teńge mólsherinde tólendi.
Nagradtalǵan anaǵa beriletin járdemaqy «Altyn alqa» jáne «Kúmis alqamen» nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa taǵaıyndalady.
Nagradtalǵan anaǵa beriletin járdemaqy aı saıyn kelesi mólsherde tólenedi:
- «Kúmis alqamen» nagradtalǵan analarǵa — 6,40 AEK nemese 25 165 teńge;
- «Altyn alqamen» nagradtalǵan nemese buryn «Batyr Ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa — 7,40 AEK nemese 29 097 teńge.
— 2025 jylǵy 1 qańtardan bastap balaly otbasylarǵa taǵaıyndalatyn memlekettik járdemaqylardyń mólsheri 6,5%-ǵa artqanyn atap ótemiz, — delingen mınıstrlik habarlamasynda.
Aıta ketelik QQS boıynsha zeınetaqy men járdemaqy ındeksteledi.