Baqytjan Bazarbek Bas prokýratýradan Almaty irgesindegi baǵaly telimderdi túgendeýdi talap etti
ASTANA. KAZINFORM — Májilis depýtaty Baqytjan Bazarbek Bas prokýror Berik Asylovtyń atyna saýal joldap, Almaty irgesindegi quıqaly telimderdi túgendeýdi talap etti.
— Almaty qalasynyń Medeý, Bostandyq jáne Naýryzbaı aýdandary boıynsha meniń memlekettik organdarmen jazǵy reıdterimde taý jotalaryn zańsyz bólip alý, ózender men jylǵalardy ruqsatsyz biteý, Іle Alataýynyń búkil bókterine jappaı qurylys salý faktileri anyqtaldy, — degen depýtat birneshe faktini mysalǵa keltirdi.
Aıtýynsha, kottedj ben elıtaly taýnhaýstar salý úshin Alataý bókterindegi taý jotalaryn tegistep tastaǵan.
— Tamyz aıynda men Almaty Medeý aýdany Kók-Tóbe aýdanynyń Kólsaı shaǵyn aýdanynda jergilikti elıtaǵa tıesili 25 jer ýchaskesi boıynsha Bas prokýratýra men alty ýákiletti organdy tekserý kerektigi jóninde bastama kóterdim. 80% jaǵdaıda mal baǵýǵa arnalǵan alqaptaǵy taý bókteri tegistelgen, — degen depýtat zańǵa engizilgen ózgeris is júzinde oryndalmaıtynyn atap ótti.
Baqytjan Bazarbek «RAMS» kompanııasyna tıesili 40 qabatty ǵımarattyń qurylysyn toqtatý úshin qanshama janjal bolǵanyn eske saldy.
Májilis ókili 3 jyl buryn súrip tastaý týraly sheshim shyǵarylǵan «Monblan» jáne «Shveıtsarııa» turǵyn úı keshenderi áli buzylmaǵanyn aıtady.
— Men Parlamentte úsh ret olardy buzý máselesin kóterdim. Ádilet mınıstrligi men memlekettik sot oryndaýshylary osy isti qolǵa alý úshin taǵy neshe ret kóterýim kerek?! Ádilet mınıstrligi men memlekettik sot oryndaýshylarynyń jumysyna suraǵym bar. Biz árbir faktini zerttep, laýazymdy adamdardyń sybaılas jemqorlyqqa qatysy bar-joǵyn tekserýge tıispiz, — dedi ol.
Májilis depýtaty Bas prokýratýradan óz saýalynda atalǵan faktilerdiń bárin jiti tekserip, Almaty aýmaǵy men irgesinde zańsyz qurylys saldarynan zııan kelgen alqaptardy túgendeýdi talap etti.
— Múmkindikti paıdalana otyryp, Almatynyń jańa ákimi Darhan Satybaldymen jumysymyz jolǵa qoıyldy. Ol kelgeli taý bókterindegi zańsyz nysandardy súrý qolǵa alyndy. Qurylysqa jaýapty ákimdik basqarmalary belsendi jumys isteı bastady. Zańsyz qurylystardy anyqtap, toqtatyp jatyrmyz, jazalaımyz da. Basqasha aıtqanda, jumys alǵa bastaldy. Bolashaqta da osy qarqynmen tıimdi jumys isteımiz dep úmittenemin, — deıdi Baqytjan Bazarbek.
Sondaı-aq, búgin Májilis depýtaty Bolatbek Nájmetdınuly Premer-mınıstr Oljas Bektenovtiń atyna «Taza paraqtan» reformasynyń oıdaǵydaı iske aspaı jatqany týraly depýtattyq saýal joldady.