Báteńke laqtyrýshy ırak jýrnalısi bir ǵana nársege ókinedi
ASTANA. Mamyrdyń 12-si. QazAqparat - 2008 jyldyń jeltoqsan aıynda sol kezdegi AQSh prezıdenti Djodj Býshqa báteńke laqtyrǵan Irak jýrnalısi Mýntazer áz-Zeıdı bir ǵana nársege ókinetinin aıtady.
Táýelsiz «Ál-Baǵdadııa» telearnasynyń tilshisi óziniń ol atyshýly áreketin Býsh pen Irak premeri Nýrı ál-Málıkıdiń Baǵdadtaǵy birlesken baspasóz máslıhaty kezinde jasaǵan bolatyn.
«Men Býshtyń meniń halqymdy qyrýdy bastap bergenine ókinish bildiremin. Ol mıllıondaǵan adamdy óltirdi... kóptegen áıelder -jesir, balalar - jetim bolyp qaldy», - dep málim etti áz-Zeıdı EuroNews telearnasyna bergen suhbatynda. Áz-Zeıdı sondaı-aq, ony túrmede qatty soqqyǵa jyqqanyn aıtty. Jýrnalıstiń pikirinshe, Býshtyń 2003 jyly Irakta bastalǵan soǵys týraly aıtqanynyń bári ótirik ekenin jetkizdi. «Irakta «demokratııa» nemese «adam quqyǵy» degen uǵymdar atymen joq. Qarańyzdarshy, mysaly saılaý qalaı ótedi, - bul qamaýdaǵy adamǵa ózin azaptaıtyn quraldy tańdaý quqyǵyn bergen sııaqty ǵoı», - dep málim etti áz-Zeıdı óz sózinde. Jýrnalıst qazirgi tańdaǵy óz elin «árkim óz úlesin alyp qalǵysy keletin tátti toqashqa» teńedi.
Áz-Zeıdı sondaı-aq, túrmeden shyqqannan keıin syılyq retinde lımýzınder, altyn áshekeıler, tipti «qalyńdyq» alǵany týraly buqaralyq aqparat quraldarynyń aqparattaryn teriske shyǵardy. Kerisinshe, túrmeden shyqqannan keıin, kezinde telearnadan alǵan baspanany da tartyp aldy, deıdi ol. Qazir áz-Zeıdı Shveıtsarııaǵa aýysyp, saıası pana týraly ótinish berdi. Jaqyn arada ol Iraktaǵy soǵystan zardap shekkenderge kómek qoryn qurmaq, dep habarlaıdy «RIA «Novostı» agenttigi.
