«Báteńke laqtyrý» úrdisi Ispanııaǵa jetti: bul joly Túrkııa premeri nysana boldy
ASTANA. Aqpannyń 23-i. QazAqparat - «Báteńke laqtyrý» úrdisi Ispanııaǵa jetti: bul joly Túrkııa premeri nysana boldy. Oqıǵa mádenıetaralyq baılanystardy damytýǵa qosqan úlesi úshin Redjep Erdoǵanǵa «NODO» qorynyń syılyǵyn tabys etý kezinde, Ispanııanyń Sevılıa qalasynda oryn aldy.
Túrkııa BAQ-tary taratqan aqparatqa siltem jasap Associated Press agenttiginiń habarlaýynsha, buzaqynyń shabýylyna Túrkııa úkimetiniń basshysy marapattaý rásimi ótken ǵımarattan shyǵyp kele jatqan kezde ushyraǵan. Premer kóligine otyra bergen kezde, demonstranttardyń biri oǵan báteńke laqtyryp, urandar aıqaılaǵan, biraq báteńke nysanaǵa tımegen.
Polıtsııa dereý ustaǵan álgi azamat kúrdterdiń jumysshylar partııasynyń múshesi kórinedi. Premerdiń kúzet qyzmetinen habarlaǵandaı, «bátińke laqtyrǵysh» masań bolǵan. Tergeý júrgizilýde. Álgi «batyrdy» qandaı jaza kútip turǵany ázirge belgisiz.
Esterińizge sala keteıik, joǵary laýazymdy tulǵalarǵa «báteńke laqtyrý dástúrin» Irak jýrnalısti Mýtadır Zaıdı bastaǵan bolatyn. 2008 jyldyń jeltoqsan aıynda ol sol kezdegi AQSh prezıdenti Djordj Býshqa báteńke laqtyryp, Irak halqynyń batyry atanǵan edi.
