BATE-men óte qıyn oıyn bolady - «Astana» FK bas bapkeri
ASTANA. QazAqparat - "Astana" FK bas bapkeri Stanımır Stoılov Eýropa lıgasynyń pleı-off synynda kezdesetin belarýstyq BATE komandasyna qatysty pikirimen bólisti.
"Men óte aýyr, qıyn oıyn bolady dep boljap otyrmyn. BATE - Eýropada 10 jyldan beri Chempıondar lıgasynda nemese Eýropa lıgasynda óner kórsetip júrgen óte tájirıbeli klýb. Biz de sońǵy eki jylda Eýropada joǵary deńgeıdegi oıyn kórsetip júrmiz. Bizdi aýyr eki match kútip tur. Kim oıyn órnegin jaqsy uıymdastyra alsa, fýtbol sáttiligi kimge joldas bolsa - sol komanda jeńiske jetedi. Eger biz ózimizdiń joǵary deńgeıimizdi kórsete alsaq, kelesi kezeńge ótemiz", - dedi bas bapker.
Aıta keteıik, "Astana" fýtbol klýby erteń, 18 tamyzda Astana Arena stadıonynda BATE komandasyn qabyldaıdy.
"Jaqsy oıyn bolady dep kútemiz. Úıde gol ótkizbegen durys. Eger bir-eki nemese odan da kóp sala alsaq, jaqsy bolar edi. Biraq eń bastysy - gol ótkizip almaý", - dedi ol.
Degenmen, Stoılovtyń aıtýyna qaraǵanda, "Astana" qorǵaýshylardan tapshylyq kórýde. Munyń aldynda "Seltıkpen" bolǵan kezdesýde eki qorǵaýshy Shıtov pen Shomko tóreshimen jazalanǵan bolatyn. Sonyń kesirinen oıynǵa qatysa almaıdy. Endi komanda tek 4 qorǵaýshymen qalyp otyr.
