Batalov fýtbol, voleıbol klýbtarynyń oıyn kórsetkishterin synǵa aldy
TALDYQORǴAN.QazAqparat - Búgin Almaty oblysynyń ákimi Amandyq Batalov «Jetisý» fýtbol klýby men «Jetisý» voleıboldan áıelder klýbynyń jattyqtyrýshylarymen jáne basshylyq quramymen kezdesti. Kezdesýde oblys basshysy eki klýbtyń da oıyn kórsetkishteriniń tómendigin synǵa alyp, klýb basshylyǵynyń aldyna naqty mindetter qoıdy, dep habarlaıdy QazAqparat oblys əkiminiń baspasóz qyzmetine silteme jasap.
Oblys ákimi Batalov Almaty oblysynyń jurtshylyǵy óńirdegi fýtbol men qyzdardyń voleıbol komandasynyń jaǵdaıyna alańdap, osy másele týraly jıi suraıtynyn aıtty.
«Qarjylandyrý jaǵynan bir tıyn da kemitken joqpyz, qajetti qoldaý sharalaryn barynsha kórsetip kelemiz. Soǵan qaramastan jumystyń nátıjesi joq. Osyǵan deıin 7 márte respýblıka chempıony bolǵan, 8 márte Qazaqstan Kýbogyn ıelengen, álemniń úzdik komandalarynyń alǵashqy 20-lyǵyna engen voleıboldan «Jetisý» áıelder komandasy ótken jyly 2-oryn, bıyl 3-oryndy mise tutyp keledi. Munyń sebebin nemen túsindiresińder?», - dep voleıbol klýbynyń basshylyǵyna suraqty tótesinen qoıdy.
Jalpy áıelder kásibı klýbyna bıylǵy jyly 300 mln. teńgeden astam qarjy bólingen. Degenmen komanda quramynan shyǵyp ketken oıynshylardyń ornyna jańa qurama jasaqtaýdaǵy kemshilikter men jattyǵý protsesiniń álsizdigi, klýb basshylyǵy tarapynan qatań talaptyń bolmaýy komanda oıynynyń quldyraýyna ákep soqqan.
Oblys ákimi Qazaqstannyń voleıboldan áıelder quramasynyń negizgi bazasyn «Jetisý» komandasynan jasaqtaý josparlanyp otyrǵanyn, ol úshin asa talantty sportshy ári Qazaqstan quramasynyń bas bapkeri Vıacheslav Shapran «Jetisý» klýbynyń bas jattyqtyrýshylyǵyn qatar atqaryp, klýbtyń deńgeıin kóterýge belsene kirisetinin jetkizdi. Bul bastama Voleıbol federatsııasynyń basshylyǵymen kelisilgenin, endigi jerde úzdik óner kórsetýge mindetti ekendikterin qadap aıtty. Aıta ketsek, quramany V. Shapran basqarǵan shaqta 2013-2015 jyldar aralyǵynda voleıboldan qyzdar komandasy Qazaqstan Kýbogy men chempıonatynda 1-oryn, al 2013 jyly Azııa chempıonatynda 2-oryn ıelengen bolatyn.
V. Shapran óz kezeginde búgingi kúni komanda quramyna jańa oıynshylar alý protsesi júrip jatqanyn, jattyǵý kestesi ázirlengenin aıtty.
Oblys ákimi A. Batalov jańa basshy V. Shapranǵa «Jetisý» voleıbol klýbynyń jattyqtyrýshylar quramyn qaıta elekten ótkizip, aldaǵy jyly el chempıony bolý týraly talabyn júktedi.
Sonymen qatar jıynda «Jetisý» fýtbol klýbynyń jumysyn jolǵa qoıý máselesi de sóz boldy. Jalpy bıylǵy jyly bul klýbqa oblys bıýdjetinen 1,6 mlrd. teńge qarastyrylǵan.
Klýbta oryn alǵan beıbereketsizdik týraly oblys ákiminiń orynbasary Serik Turdalıev baıandady:
«Sizdiń tapsyrmańyzben klýbtyń jumysyna júrgizilgen tekserý barysynda birqatar zańsyzdyqtar anyqtaldy. 2010 jyldan beri jymqyrylǵan qarjy kólemi 1,2 mlrd. teńgeni quraǵan. Oǵan qosa tek qana aıyppul tóleý men sot shyǵyndarynyń ózine 980 mln. teńge jumsaldy. Kináli tulǵalar jaýapqa tartyldy. Oblys bıýdjetinen 2015-2016 jyldary bólingen qarjy tek qana qordalanǵan qaryzdardy tóleýge jumsaldy. Klýbtyń qatysýymen sot protsesteriniń úzdiksiz júrýi oıynnyń sapasyna óziniń keri áserin tıgizdi. Eń bastysy qazir klýbtyń jumysyn tártipke keltirdik, jemqorlyqty toqtattyq», - dedi S.Turdalıev.
Oblys ákimi A. Batalov «Jetisý» FK-niń jańa basshysy S.Muqanovqa klýbta eń bastysy qarjylyq tártip bolýyn, komanda quramyn zerttep, iske dendep kirisýdi tapsyrdy.
Oblystaǵy jalpy sport salasynyń aıaq alysy da synǵa alyndy.
«Óńirdegi sporttan jańa esimder nege shyqpaıdy? Fýtbol men voleıboldan bólek qazaq kúresinen, qysqy sporttan, aýyr atletıkadan, sporttyń basqa da túrlerinen nátıjeli jumysty kórip turǵan joqpyn. Osy synnan qorytyndy shyǵaratyn bol», - dedi A. Batalov oblystyq sport basqarmasynyń basshysy T. Sharapıevke.
«Biz sportqa balalardy jastaıynyn beıimdep, tárbıeleýimiz kerek. Olardan myqty oıynshy shyǵarý úshin kem degende on jyl ketedi. Bul protsess bizde úzdiksiz júrýi kerek. Mine, seniń aınalysýǵa tıis jumysyńnyń mańyzdysy da osy bolýǵa tıis», - dedi A. Batalov sport basqarmasynyń basshysyna qaratyp.
Sonymen qatar voleıbol men fýtboldan kúni erteń bizdiń negizgi quramamyzdy qalyptastyratyn balalar klýbyn damytyp, búgingi jetken jetistikterin eseleýdi, oınaý mashyqtaryn odan ári jetildirýdi tapsyrdy.
Jıyn sońynda A. Batalov eń bastysy - qos klýbta da qarjylyq zańdylyqtardy saqtaý, oıynshylardy sapaly irikteý jáne jattyǵý protsesin úzdiksiz júrgizý óziniń nátıjesin beretinin atap aıtty. «Jetisý» áıelder voleıbol klýbyna kelesi jyly Qazaqstannyń chempıony bolýdy, al «Jetisý» fýtbol komandasyna bıylǵy jyly birinshi lıgadan Premer-Lıgaǵa kóterilip, 2018 jyly Premer-Lıgada 3-5 oryndardan kórinýdi mindettedi.
Atap ótsek, jalpy oblystaǵy sport salasyna 2017 jyly 6 mlrd. teńge bólingen.
