Batalov aýdan ákimine: Jaǵdaı qaıtalansa óziń kúzetshi bolasyń
TALDYQORǴAN.QazAqparat - Almaty oblysynda aýdan ákimi kúzetshi bolýy múmkin. Búgin Amandyq Batalov Aqsý aýdanynyń ákimine osyndaı eskertý jasady, dep habarlaıdy QazAqparat tilshisi.
Sebebi, «Aqsý qant zaýytyn» urylar tonap jatyr. Al atalǵan nysanda kúzetshi qoıylmaǵanǵa uqsaıdy.
«Maǵan zaýyttyń zattaryn urlap jatyr dedi. Nege kúzet qoımaısyń? Sol jerde júrip nege baqylamaısyń?! Eger osyndaı jaǵdaı qaıtalanatyn bolsa, óziń sol jerde kúzetshi bolasyń», - dedi Amandyq Batalov.
Óńir basshysynyń qatań synyna ushyraǵan Ádilbek Dalbaǵaev atalǵan zaýytta kúzetshi bar ekenin aıtyp aqtaldy.
Bul Aqsý aýdanynyń ákimine aıtylyp otyrǵan alǵashqy syn emes. Óńir basshysynyń eskertýine jıi ushyraıtyn ákimderdiń arasynda Ádilbek Dalbaǵaev kósh bastap tur.
Aıta ketý kerek, birneshe jyl boıy toqtap turǵan «Aqsý» qant zaýytyn iske qosý jumystary júrgizilip jatyr. Atalǵan nysan bıyl alǵashqy ónimin qabyldaýdy josparlap otyr.
