Batalov: Almaty oblysynda taǵy 2 qant zaýyty qalpyna keltiriledi

TALDYQORǴAN.QazAqparat - Almaty oblysynyń Alakól jáne Qarabulaq qant zaýyttaryn qaıta qalpyna keltirý josparlanýda. Óńirdegi qyzylsha alqabynyń aýmaǵyn 35 myń gektarǵa ulǵaıtý arqyly qant qyzylshasy kólemin eki mıllıon tonnaǵa deıin jetkizý mejesi belgilengen, - dep habarlaıdy QazAqparat tilshisi.

Bul týraly búgin Ortalyq kommýnıkatsııalar qyzmetinde brıfıng ótkizgen Almaty oblysynyń ákimi Amandyq Batalov málimdedi.

Oblys basshysy baıandamasynda Agroónerkásiptik keshende 2022-2026 jyldarǵa arnalǵan Ulttyq joba sheńberinde et, jemis-jıdek, kókónis, qant, sút ónimderi, dándi jáne maıly daqyldardy óndirý men óńdeý boıynsha jeti iri ekojúıe qalyptastyrý josparlanǵanyn atap ótti. Óńirde 1,3 mln bas iri qara, 4,5 mln bas qoı-eshki, 1 mln gektarǵa jýyq egis alqaby bar ekenin eskersek, oblys osy jobanyń eń belsendi qatysýshylarynyń biri bolyp tabylady.

«Mysaly, qant óndiretin eki zaýyt jumys istep tur, endi Alakól jáne Qarabulaq qant zaýyttaryn qalpyna keltirý josparlanýda. Osylaısha biz alqap aýmaǵyn 35 myń gektarǵa ulǵaıtý arqyly qant qyzylshasy kólemin eki mıllıon tonnaǵa deıin jetkizý mindetin qoıyp otyrmyz», - dep atap ótti A.Batalov.

Óńir basshysy et óńdeıtin «Jetisý Qoı» jobasynyń júzege asyryla bastaǵanyna da toqtaldy. Búgingi kúni barlyq uıymdastyrý máseleleri sheshilgenin, ınjenerlik ınfraqurylym qurylysyna qarjy bólingenin, ınvestordyń zaýytty jobalaýdy bastaǵanyn aıtty.

Et óńdeıtin «Jetisý Qoı» jobasy týraly da eske salyp, oǵan qatysty barlyq máseleler sheshilgenin, ınjenerlik ınfraqurylym qurylysyna qarjy bólingenin jetkizdi.