Basynda atústi qaraımyz da, jyldyń sońynda kináli adamdy izdeımiz - Úkimet basshysy
ASTANA. QazAqparat - Úkimettiń búgingi otyrysynda Premer-mınıstr Baqytjan Saǵyntaev jylý maýsymy bastalǵaly beri «Arsellor Mıtallǵa» qarasty JES-2-de 17 apattyq jaǵdaıdyń bolǵanyn, búgin tańǵy saǵat 6:20-da eki qazandyqtyń toqtap turǵanyna qaramastan taǵy bir qazandyqtyń isten shyǵý máselesin kóterdi. Osyǵan baılanysty Úkimet basshysy Qaraǵandy oblysynyń ákimi Nurmuxambet Ábdibekovten esep berýdi talap etti, dep xabarlaıdy QazAqparat tilshisi.
«Temirtaýlyqtardyń úılerinde aýa temperatýrasy 16 gradýstan joǵary kóterilmeıdi. Al aýa-raıy kúrt sýytyp ketkende 12 gradýsqa deıin túsip ketedi», - dedi Saǵyntaev.
Osy oraıda Qaraǵandy oblysynyń ákimi Nurmuxambet Ábdibekov ondaı jaǵdaıdyń bar ekenin moıyndady. Alaıda búginnen qaldyrmaı, bir qazandyqty, al erteń taǵy bir qazandyqty iske qosýǵa ýáde berdi. Aımaq basshysynyń aıtýynsha, eki kúnnen keıin temirtaýlyqtardyń úılerinde turaqty temperatýra ornaıtyn bolady.
«Jalpy, jylý maýsymy bastalǵaly beri Temirtaýda jylý berilmeı qalǵan kez birde-bir ret bolǵan joq. Iá, ázirshe temperatýralyq rejım tómen. Onyń barlyǵy qazandyqtardyń isten shyǵýyna baılanysty», - dedi Ábdibekov.
Degenmen, Úkimet basshysy ondaı jaýapqa qanaǵattanǵan joq.
«Nurmuxambet Qanapııauly, 12 gradýstyq jylýdy berip jatyrmyz dep, maqtanýdyń qajeti joq dep oılaımyn. Ondaı jaǵdaıda jylý berilmeı qalǵan birde-bir kún bolmady deýdiń ózi durys emes. Nege birinshi qazandyqty jóndeý jumystary endi ǵana aıaqtalyp jatyr? Mınıstrlikter durys baqylamady ma? Apta saıyn selektorlyq otyrys ótkizemiz, ylǵı aıtamyz. Bizde energetıkalyq qadaǵalaý jáne taǵy basqa organdar bar. Basynda atústi qaraımyz da, jyldyń sońynda kináli adamdy izdeımiz. Aqyr sońynda xalyq qınalady. Osynyń bárin birden rettep alýǵa bolmady ma?», - dedi Saǵyntaev.
Osy oraıda Premer-Mınıstr eki kúnnen keıin Temirtaýdaǵy jylýdy qalpyna keltirý - jumystyń taǵy bir márte tekseriletinin eskertti.
Energetıka mınıstri Qanat Bozymbaev bolsa, atalǵan problema jaıynda bir aı buryn aıtqanyn jetkizdi.
