Basyna muz qulaǵan áıeldiń ólimine ǵımarat ıesi jaýapty - ákim
«20 qarasha kúni 9 qabatty «Adal Residence» turǵyn úı kesheniniń aldynda 60 jastaǵy áıeldiń ústine muz kesegi qulap, mert qyldy. Bul jaǵdaı qoǵamda úlken rezonans týǵyzdy. Oqıǵa eldiń iri BAQ-tarynda talqylandy. Qazir polıtsııa atalǵan jaıtqa qatysty tergeý júrgizip jatyr. Kim jaýapty ekenin tergeý kórsetedi. Júrgizilgen tekserý nátıjesinde QR zańnamasyna sáıkes sharalar qabyldanady. Almaty qalalyq kóriktendirý erejesiniń 93-pýnktine sáıkes, shatyrdy muzdan, qardan tazalaý jumystary úshin ǵımarat ıesi jaýapty. Eger ol turǵyn úı bolsa, tazalyq úshin PIK nemese basqarýshy uıym jaýapty bolady. Qar tym kóp bolmaǵanymen, shatyr qurylysynyń ereksheligine qaraı jınalǵan muz súńgisi kesekke aınalǵan. Ókinishke qaraı, munyń arty qaıǵyly jaǵdaıǵa ákeldi», - dedi Altaı Rahymbetov.
Aýdan ákimi Bostandyq aýdanynda 1770 bıik úı bar ekenin aıtty.
«Kommýnaldyq qyzmet ókilderi kún saıyn osy ǵımarattardyń shatyryna muz qatyp, qar basýyn baqylap júredi. Biraq, barlyǵynyń tazalanǵanyn baqylap otyrý múmkin emes. Sondyqtan, birinshi kezekte ol úshin PIK jaýap berýi tıis», - dedi ákim.
Aýdan ákimi turǵyndardan tazalanbaǵan shatyrlardy baqylap, áleýmettik jeli arqyly sýretin jiberip turýdy ótindi.
Aıta ketý kerek, tótenshe jaǵdaı 20 qarashada bolǵan edi. Ǵımarattyń qasynan ótip bara jatqan áıeldiń basyna 9 qabattyq bıiktikten muz kesegi túsip, mert qyldy.
Qaıǵyly oqıǵaǵa qatysty aýdandyq kommýnaldyq sharýashylyq bóliminiń bas mamany Janat Jaqsybaev túsinikteme bergen bolatyn.
