«Basym halyq ustanatyn dinge basymdyq berýge qarsylar da bar eken»-respýblıkalyq basylymdarǵa sholý
***
Álimsaqtan bastaý alǵan týra bıdiń tóreligine bas ııý, ádildikke qol jetkizý ata-babadan, urpaqtan urpaqqa jalǵasyp kele jatqan izgilikti senim. Senim bar jerde úmit shoǵy sónbeıdi. Al sot bıligine senimdi joǵaltý jalpy bılikke kúmán keltirýmen birdeı. Sondyqtan da Memleket basshysy sotqa degen senim - memleketke degen senim ekendigin aıtqan bolatyn. Sot júıesi ózgerýde, Joǵarǵy Sot apparaty jańadan qurylý ústinde. Burynǵy tórelik etý qurylymdary tolyqtyrylýda. Óıtkeni, osy kezge deıin birqatar máseleler eleýsiz qalǵan edi. Mine, sondaı irgeli jańalyqtarǵa baılanysty «Egemen Qazaqstan» gazeti Joǵarǵy Sot Tóraǵasy Bektas Beknazarovpen alda turǵan jańa mindetter jóninde suhbat jarııalady. Ekeýara áńgime «Sotqa degen halyq senimin nyǵaıtý - basty maqsatymnyń biri» degen taqyryppen berilgen.
«Egemen Qazaqstan» gazetiniń jazýynsha, Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda saıajaı, baý-baqsha jáne qosalqy sharýashylyqtardy damytýdyń 2011-2014 jyldarǵa arnalǵan sharalar kesheni qaraldy. Aýyl sharýashylyǵy mınıstri Asyljan Mamytbekov tanystyrǵan sharalar kesheni saıajaı kooperatıvterin jeńildikpen qarjylandyrý úshin ár oblysqa áleýmettik-kásipkerlik korporatsııalary arqyly 50 mıllıon teńgeden bólýdi kózdeıdi. Sonymen qatar saıajaıshylardyń arnaýly tehnıkalar satyp alýy shaǵyn nesıelermen qamtýǵa ár oblysqa 20 mıllıon teńgeden qarjy bólý qarastyrylyp otyr.
***
«Alash aınasy» gazetiniń turaqty «Dat!» aıdarynda QR Kólik jáne kommýnıkatsııa mınıstri Berik Kamalıevpen aradaǵy suhbat «Batys Eýropa - Batys Qytaı dálizi sekildi mega-jobalar otandyq mamandardy jańa sapalyq deńgeıge kóteredi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen mınıstr: «Barsha Alash úshin eń qasterli uǵym Táýelsizdik ekeni kúmánsiz aqıqat. Bıyl - el Táýelsizdiginiń 20 jyldyq mereıtoıy. Eń aldymen, memleketimizdiń irgesi máńgi bútin bolsa dep tileımin», - depti. Ekeýara áńgimeniń tolyq nusqasyn basylymnyń beısenbilik sanynan oqı alasyzdar.
«Keshe Májilis óziniń osy sessııadaǵy sońǵy otyrysyn ótkizdi. Sońǵy otyrystyń júgi de ózine saı bolǵan tárizdi. Aldymen kún tártibi úshin birshama qyrqysqan depýtattar kórshi elderdegideı judyryqtasýǵa barmasa da, aýyzǵa kelgenderin aıtyp qalysty. Abyroı bolǵanda, tóbede otyrǵan tóraǵa Oral Muhamedjanovtyń aralasýymen ǵana is nasyrǵa shappaı qalǵandaı boldy», - dep jazady «Alash aınasy» gazeti. Osylaısha, kún tártibiniń ózi qyzyqty bastalǵan Májilistiń keshegi otyrysy týrasynda mol maǵlumat alǵyńyz kelse, basylymdaǵy «Basym halyq ustanatyn dinge basymdyq berýge qarsylar da bar eken» degen taqyrypqa nazar aýdaryńyz.
***
Sońǵy kezderi «Qytaı ekspansııasy Qazaqstanǵa qaýip tóndirýde» degen syńaıly pikirler buqaralyq aqparat quraldarynda jıi aıtylatyn boldy. Buryn da mundaı pikirdi estıtinbiz, biraq anda-sanda bir estıtindikten be, oǵan onsha kóńil bóle qoımaıtyn edik. Tipti osy sońǵy kezde buryn qazaq gazetteri ǵana sóz etetin osynaý taqyrypqa orystildi basylymdar da oı tolǵaı bastapty. Osyǵan oraı «Aıqyn» gazeti jurtty erekshe eleńdetip otyrǵan taqyrypqa sholý jasap, bas taqyrypqa alynǵan «Túsinbestiktiń tórkini nede?» degen suraqqa «ıá», «joq» jáne «ne isteý kerek?» degen retpen jaýap bergen.
«QazMunaıGaz» ulttyq kompanııasynyń qoldaýymen «Memlekettik tildi damytý» Prezıdenttik qory men Halyqaralyq «Qazaq tili» qoǵamy el Táýelsizdiginiń 20 jyldyǵyna tartý retinde «Elbasy jáne memlekettik til» atty jınaqtyń tusaýyn kesti», - dep jazady «Aıqyn» gazeti. Basylymnyń atap ótýinshe, kitapqa Nursultan Nazarbaevtyń buryn-sońdy jarııalanbaǵan qazaq tilindegi shyǵarmalary men aıtqan sózderi jáne elimizdiń 20 jyl ishindegi memlekettik til saıasatynyń negizgi baǵyttaryn tanytatyn qujattar engen. Sonymen qatar jınaqqa QR Tuńǵysh Prezıdentiniń memlekettik til týraly oılary, onyń basshylyǵymen qabyldanǵan zańdar men baǵdarlamalar, ártúrli basqosýlarda jasaǵan baıandamalary, Qazaqstan halqyna jyl saıynǵy dástúrli Joldaýynda tilge qatysty aıtqan usynystary men pikirleri toptastyrylǵan.
***
«Memleket basshysy Nursultan Nazarbaev Eýropa Keńesi Parlamenttik Assambleıasynyń (EKPA) tóraǵasy Mevlıýt Chavýshoǵlymen kezdesti», dep jazady «Kazahstanskaıa pravda» gazeti. Kezdesý barysynda taraptar Qazaqstan men EKPA-nyń jaı-kúıi men yntymaqtastyǵynyń keleshegin talqylady. «Biz Qazaqstanmen óte jaqsy yntymaqtastyqtamyz. Birneshe jyl buryn bizdiń aramyzda yntymaqtastyq týraly shartqa qol qoıylǵan. Qazaqstan Parlamenti bizdiń sessııamyzǵa qatysyp turady. Biz birlesken iri is-sharalarǵa qatysamyz. Biz jemisti qatynastarymyzdy qalyptastyrýymyz kerek», - dep atap ótken M.Chavýshoǵly.
