Bastyqtardyń kabınetterin kishireıtý aktsııasy qaı mekemelerde jalǵasady
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi «Jańa format» aktsııasyn mektepterdi tekserýden bastady.
Aktsııanyń negizgi maqsaty - bastyqtardyń kabınetterin ońtaılandyryp, bıýdjet shyǵyndaryn barynsha qysqartý, dep xabarlaıdy QazAqparat tilshisi.
Astana qalalyq departamentiniń basshysy Jazıra Jylqyshıevanyń aıtýynsha, mektepterden keıin medıtsına mekemeleri tekseriledi.
«Biz bul aktsııany jaıdan-jaı bastaǵan joqpyz. Búginde memlekettik mekeme basshylary úshinshi-tórtinshi qabatta keremet úlken kabınetterde otyrady. Mysaly, Astanada oqýshylar kóp. Al dırektordyń kabınetin bosatýdyń arqasynda qosymsha synyptardy ashýǵa múmkindik bar. Qosymsha bilim berý, robototexnıka, shyǵarmashylyq shyńdaý sııaqty synyptardy ashýǵa bolady. Ol úshin qosymsha ǵımarat ta salýdyń qajeti joq. Dırektor kabınetin bosatyp berse boldy. Onymen jalaqysy azaımaıdy, qyzmeti de tómendemeıdi. Endigi kezekte biz emxana basshylarynyń kabınetterin tekseremiz. Byltyr biz biraz jumys jasadyq. Osy joly birinshi basshylardy da tómen túsirip, xalyqqa jaqyn otyrǵyzatyn bolamyz», - dedi J.Jylqyshıeva QazAqparat tilshisine bergen suxbatynda.
Aıta keteıik, aktsııa aıasynda mektep dırektorlarynyń kabınetteri tym úlken ekeni anyqtaldy. Mysaly, 90 sharshy metrdi quraıtyn qabyldaý, tynyǵý jáne qonaqtarmen kezdesý bólmeleri bar. Oǵan qosa, esep-qısap pen kadr bólimderiniń keń kabınetteri kezdesti.
«Negizi, zań boıynsha mektep basshylyǵynyń kabıneti 32 sharshy metr bolýy kerek. Al qabyldaý bólimi 12 sharshy metrde ornalasýy shart. Astana mektepterinde atalǵan normalar saqtalmaıdy. Máselen, №54 mektep-lıtseıde dırektor 90 sharshy metrdi qamtıtyn jumys, demalys jáne qabyldaý bólimderin bosatyp berdi. Qazir ol jerde muǵalimderge arnalǵan jumys bólmesi ornalasty. Dırektordyń jańa kabıneti 13 sharshy metr boldy. Sol sııaqty №17 mektep-dırektorynyń kabıneti 40 sharshy metr bolsa, qazir ol birinshi qabatqa aýystyryldy. Burynǵy kabınette oqýshylar robototexnıka jáne shyǵarmashylyq shyńdaý boıynsha bilim alýda», - deıdi J.Jylqyshıeva.
Onyń sózine qaraǵanda, №80 mektep-gımnazııasynyń dırektory da jańa aktsııany qoldady. Ol 53 sharshy metrdi bosatyp berdi. Qazir ol jerde qosymsha sabaqtar ótip jatyr. №71 mektep-lıtseıi de solaı. Dırektory 50 sharshy metrdi bosatyp, birinshi qabatqa kóshti.
«Búginde atalǵan mektepterdiń basshylyǵy astynda otyryp, bárin kórip otyrady. Oqýshylardyń kirgenin-shyqqanyn jáne basqa da jaǵdaılardy baqylaýǵa múmkindik bar. Ata-analar shý shyǵarsa, ony da kóre alady. Halyqqa jaqyn bolý degen osy. «Osyny ózderińiz oılamadyńyz ba?» dep surasaq, joq deıdi», - dep atap kórsetti J.Jylqyshıeva.
