«Bastyqtar kresloǵa lıftpen emes baspaldaqpen jetýi tıis» - BAQ-qa sholý
***
«Jańa ǵasyrdyń alǵashqy onjyldyǵynyń taǵy bir belesi bolyp belgisizdiktiń belgisi kóp 2013 jyl tabaldyryqtan attady. Kúlli álem úshin ótken jyldyń baıyrqaly baǵasyn berip, kelip jatqan jyldyń mindetti mejelerin belgilep alatyn jaýapty shaq týdy. Degenmen, tap osy tusta Eýropanyń eleńdep, Amerıkanyń alańdap otyrǵany anyq baıqalady», - dep jazady «Egemen Qazaqstan» gazeti. Basylymnyń atap ótýinshe, buǵan eń aldymen 2012 jyldyń qorytyndylary kópshilik kútkendegiden kóp tómen bolyp shyqqany sebep bolǵan sııaqty. Bul jylǵy qarasha aıynda eýroaımaqtaǵy jumyssyzdyqtyń deńgeıi rekordtyq mólsherge jetti. Al bıylǵy jyly kári qurlyq elderiniń byltyr bastalǵan únemdeý baǵytyn burynǵydan beter arttyra túspek nıette ekenin eskersek, keler kúnder kemerindegi kókjıektiń qandaı túspen boıalǵaly turǵanyn paıymdaý taǵy qıyn emes. Maqala «Eleńdeýli Eýropa, alańdaýly Amerıka» degen taqyryppen berilgen.
Ústimizdegi jyldyń aqpan aıynyń sońynda Hrapýnovtar otbasyna baılanysty Jeneva prokýratýrasy qozǵaǵan aldyn ala tergeý isi aıaqtalýǵa tıis. Ótken jyldyń qarasha aıynda Shveıtsarııaǵa aýdarylǵan aqsha qarajatynyń bastaýyn tabý maqsatynda prokýror Jan-Bernar Shmıd tergeý sharalaryn qolǵa alǵan bolatyn. Bul iske Vıktor Hrapýnov pen onyń zaıyby Láıla Beketova-Hrapýnovadan basqa, kezinde «Swiss Development Group» kompanııasynyń prezıdenti bolǵan, keıbir buqaralyq aqparat quraldary arqyly «adal, tártipti kásipker» retinde jarnamalanǵan olardyń uldary Іlııas ta tartyldy. Mine osy jaıt arqaý bolǵan maqala «Egemen Qazaqstan» gazetiniń búgingi sanynda «Hrapýnovtar baılyǵy qalaı quralǵan?» degen taqyryppen berildi.
***
«Aıqyn» gazetiniń jazýynsha, keshe reseılik telearnalar Úndistandaǵy qarsylyq aktsııasyn kórsetip jatyr. Parlamentte úndisterdiń múddesin qorǵaıtyn Bharatııa djanata partııasy Áýlıe Valentın kúnin jappaı merekeleýge qarsy sharalar uıymdastyrypty. Jergilikti halyq mahabbat merekesin toılamaqshy bolǵan jekelegen adamdardy sabaýǵa deıin barǵan. Bul merekege daıyndalyp, jarnama bergen toıhanalar talqandalǵan. «Óıtkeni bul kúni qyzdarǵa tıisetinder, áıel zorlaýshylar kóbeıetin kórinedi. Úndi dinı basshysy Asaram Bapý budan eki-úsh jyl buryn 14 aqpandy «ata-analar kúni» nemese «ata-analardy eske alý kúni» dep ataýdy usynǵan bolatyn. Byltyrdan bastap úndister bul kúni áke-sheshelerin quttyqtaı bastapty», - delingen «Valentınge bári qarsy» degen taqyryptaǵy maqalada.
Osy basylymnyń búgingi nómirinde Ortalyq saılaý komıssııasy tóraǵasynyń orynbasary Vladımır Foospen aradaǵy suhbat «Saılaý 50 okrýgti qamtıdy» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Qazaqstan - 2050» Strategııasynda Prezıdent N.Nazarbaev aýyldyq okrýgterdiń, poselkelerdiń, sondaı-aq aýdandyq mańyzdaǵy 50 qalanyń ákimderi saılanatyndyǵyn jarııa etti. Sonda jalpy qarasy 2500-den asady. Bul - Memleket basshysy aıtqanyndaı, barlyq deńgeıdegi ákimderdiń jalpy sanynyń 91,7%-y. Osylaısha, azamattarmen tikeleı jumys jasaıtyn jáne máselelerdi jergilikti jerlerde sheshýmen shuǵyldanatyn barlyq derlik ákimder saılaýmen qamtylady», - deıdi.
***
«Alash aınasy» gazetiniń juma kúngi nómirinde «Bastyqtar kresloǵa lıftpen emes baspaldaqpen jetýi tıis» degen taqyryppen jaryq kórgen maqalada memlekettik qyzmettegi laýazymdy tulǵalardyń jaýapkershiligin arttyrý, sheneýnikterdiń jemqorlyqqa jaqyndyǵy máselesi aıtylǵan. Basylymnyń alǵa tartqan derekterine qaraǵanda, byltyr 1600-ǵa tarta laýazymdy tulǵanyń ústinen qylmystyq is qozǵalǵan. Onyń ishinde 450-i respýblıkalyq deńgeıdegi laýazym ıeleri bolsa, qalǵandary qalalyq jáne aýyldyq deńgeıdegi shesheýnikter eken.
