Basty rólde Deparde oınaıtyn Stalın týraly fılmdi túsirý bastaldy
ASTANA. QazAqparat - Portýgalııada «Stalınniń dıvany» dep atalatyn frantsýz fılmin túsirý bastaldy, dep habarlady Rosbalt.
Fılmniń rejısseri Fannı Ardan, bas rólde reseılik Jerar Deparde oınaıdy.
Rekvızıtter men shyǵarmashylyq ujym úshin kostıýmderdi reseılik «Mosfılm» kınokontserni berdi. Deparde úshin frenchti tarıhı úlgiler boıynsha frantsýz taraby tiktirýde.
Stsenarıı negizine Jan-Danıel Baltasstyń «Stalınniń dıvany» romany alyndy. Sıýjet boıynsha jas sýretshi Danılov «Halyqtar ákesi» monýmentiniń jobasyn talqylaý úshin 1950 jyly keńestik kóshbasshynyń Grýzııadaǵy qupııa rezıdentsııasyna attanady. Keńes memleketi basshysymen kezdesý aldynda Danılov general Vlasıktiń qatal synynan ótýi tıis bolady.
Jobany júzege asyrýdy Leopardo Filmes óz mindetine aldy. Fılmniń premerasynyń ótetin kúni ázirge habarlanǵan joq.
