Basty mindet - joǵary bilim júıesin eńbek naryǵynyń talaptaryna sáıkestendirý - B. Jumaǵulov
ASTANA. 20 qarasha. QazAqparat - Mamandar daıarlaý naryq suranysyna baǵyttalyp jatyr. Endigi mindet - joǵary bilim júıesin eńbek naryǵynyń talaptaryna sáıkestendirý.
Bul týraly búgin Memleket basshysynyń jastar saıasaty máseleleri boıynsha bergen tapsyrmalaryn iske asyrý jaıyn saralaǵan Úkimet otyrysynda sóılegen sózinde Bilim jáne ǵylym mınıstri Baqytjan Jumaǵulov aıtty.
«Buryn kóptegen jyldar boıy gýmanıtarlyq mamandyqtar basym bolyp kelgen. Al qazir kadrlyq daıarlaý júıesi naryqtaǵy naqty suranysqa saı bolyp kele jatyr. Jumys berýshiler tehnıkalyq jáne kásiptik bilim júıesinde belsendi jumys júrgizýde», - dep toqtaldy mınıstr.
Vedomstvo basshysynyń sózine qaraǵanda, olar kadrlar daıarlaýdy basqarýdyń joǵary organdary - Ulttyq keńestiń, salalyq jáne aımaqtyq keńesterdiń jumysyna qatysady. Sonymen qatar ol Elbasynyń tapsyrmasy boıynsha oqytýdyń dýaldi júıesi keń kólemde engizilip jatqandyǵyn eske salyp ótti. «Endigi mindet - joǵary bilim júıesin eńbek naryǵynyń talaptaryna sáıkestendirý. Qazirgi ýaqytta onyń jeke menshik segmenti kóbinese halyqtyń suranysyna baılanysty bolyp jatyr. Nátıjesinde kóptegen bitirýshiler jumysqa ornalasýda qıyndyqqa tap bolýda. Memlekettik tapsyrys boıynsha mamandar daıarlaý naryq suranysyna baǵyttalyp jatyr. Endi memlekettik , jeke menshik segmentterde belsendi sharalardy júzege asyramyz», - dep túıindedi B. Jumaǵulov.
