Basty mindet - ekonomıka salasyn turaqtandyrý

Sizderdiń qaraýlaryńyzǵa eki qujat engizilip otyr, ıaǵnı birinshisi - Qazaqstan Respýblıkasynyń 2016-2020 jyldarǵa arnalǵan áleýmettik-ekonomıkalyq damýynyń naqtylanǵan boljamy, al ekinshisi  - «Qazaqstan Respýblıkasynyń Ulttyq qorynan 2016-2018 jyldarǵa arnalǵan kepildendirilgen transfert týraly «Qazaqstan Respýblıkasynyń Zańyna ózgerister engizý týraly» Qazaqstan Respýblıkasy Zańynyń jobasy», dedi mınıstr.

Vedomstvo málimetine qaraǵanda, álemdik ekonomıkanyń aǵymdaǵy jaǵdaıyn, taýar naryqtaryndaǵy konıýnktýrany jáne aǵymdaǵy jyl basynan beri Qazaqstan ekonomıkasy salalarynyń damý qorytyndylaryn eskere otyryp, 2016 jylǵa arnalǵan makroekonomıkalyq kórsetkishterdiń boljamy naqtylandy. Bul rette munaıdyń ortasha jyldyq baǵasy bir barreline 30 AQSh dollarynan 35 AQSh dollaryna deıin ósti. Metall baǵalarynyń ózgerý ındeksi 2015 jyldyń deńgeıine 15,0%-dan 12,7%-ǵa deıin tómendedi. AQSh dollarynyń ortasha jyldyq esepteý baǵamy bir AQSh dollaryna 360 teńge deńgeıinde saqtaldy. Aǵymdaǵy jylǵy qazan aıynda «Qashaǵan» ken ornynyń iske qosylýynyń josparlanýyna baılanysty munaı óndirý kólemi 74,0 mln. tonnadan 75,5 mln. tonnaǵa deıin ósti, dedi Q. Bıshimbaev.

Sondaı-aq, bıyldyń basynan bergi ekonomıka salalarynyń damý serpinin jáne jańartylǵan stsenarıılik jaǵdaılardy eskere otyryp, 2016 jyly ІJÓ-niń ósýi buryn maquldanǵan 0,5% deńgeıinde qalady. Al nomınaldy ІJÓ 44 trln. 354,0 mlrd. teńge kóleminde boljanyp otyr, bul aqpan aıynda maquldanǵan kórsetkishten 187,5 mlrd. teńgege artyq. Al halyqtyń jan basyna shaqqandaǵy ІJÓ-i 6,9 myń AQSh dollaryn quraıdy.

Úkimet otyrysynda 2017-2018 jyldarǵa arnalǵan respýblıkalyq bıýdjet jobasy boıynsha qarjy mınıstri Baqyt Sultanov baıandady. Bıýdjettiń shyǵys bóligin naqtylaýdyń basty maqsaty - tıimdi jumys oryndaryn qurý, ekonomıkalyq ósimdi yntalandyrý. Bul baǵyt­tarǵa 283,4 mlrd. teńge jumsaý kózdelip otyr, dedi qarjy mınıstri. Sondaı-aq, úsh ne­gizgi blok boıynsha bıýdjet shyǵystaryn arttyrý kózdeledi. Atap aıtqanda, agroónerkásip sektoryn qoldaýǵa qosymsha 97,3 mlrd. teńge bólý qarastyrylady. Indýstrııalyq-ınnovatsııalyq damýdyń ekinshi kezeńine qosymsha 112 mlrd. teńge kózdeledi.  Al kóliktik ınfraqurylymdy damytýǵa 74 mlrd. teńge bólinetin bolady,  dedi B.Sultanov.

Aǵymdaǵy bıýdjetti naqtylaýǵa áleýmettik turaqtylyqty saqtaýdan bólek, memleket pen azamattardyń qaýipsizdigin qamtamasyz etý baǵytyna da bıýdjetten qosymsha qarajattar qarastyrylyp otyr. Bıýdjet jobasynda osy maqsattar úshin kúsh qurylymdary baǵyttaryna qosymsha qarajat 72 mlrd. teńge shamasynda bólinetin bolady.

Ulttyq bank tóraǵasy Danııar Aqyshev Ult­tyq banktiń negizgi ındıkatorlary týraly áńgimeledi. Aıtýynsha, jyl sońyna deıin elimizdegi ınflıatsııanyń boljanǵan deńgeıden asyp ketý qaýpi bar. Degenmen, Úkimet pen jergilikti atqarýshy organdar baǵa men tarıf­terdiń ósip ketýine jol bermeý boıynsha sharalar keshenin iske asyrǵan jaǵdaıda 2016 jyly ınflıatsııany bekitilgen deńgeıde ustap turýǵa bolady. Al Ulttyq bank óz tarapynan aqsha jáne valıýta naryqtarynda turaqtylyqty qamtamasyz etýge baǵyttalǵan aıqyn aqsha-kredıt saıasatyn jalǵastyrýdy qamtamasyz etedi, dedi D.Aqyshev.

Otyrys qorytyndysynda Áleýmettik-eko­no­­mı­ka­­lyq damý boljamdary men zań jobalary maqul­dandy.