Basty maqsat - premer-lıgaǵa oralý - «Aqjaıyq» bapkeri
ORAL. QazAqparat - Basty maqsat - premer-lıgaǵa oralý. Bul týraly Túrkııada oqý-jattyǵý jıynyn ótkizip jatqan «Aqjaıyq» komandasynyń bas bapkeri Sergeı Zaıtsev málim etti, dep habarlaıdy QazAqparat tilshisi.
Oraldyq komandany ótken jazdan beri jattyqtyryp kele jatqan ýkraınalyq mamannyń aıtýynsha, jańa maýsymǵa daıyndyq qalypty ótýde.
- Alǵashqy jıyn bolǵannan keıin eń aldymen oıynshylardyń dene daıyndyǵyna kóńil bólýdemiz. Qazir komanda kúnine úsh ret jattyǵýda. Jigitterdiń kúsh-qýatyn qalpyna keltirip, tehnıka men komandalyq taktıkany qalyptastyrýymyz kerek. Jattyǵý kezinde osy úsh máselege erekshe nazar aýdaryp jatyrmyz. Aldymyzǵa premer-lıgaǵa qaıta oralý mindeti qoıylǵandyqtan, oqý-jattyǵý jıyny kezinde tynbaı eńbek etý mańyzdy, - deıdi bas bapker.
- Al komandaǵa jańadan qosylǵan jastar jóninde ne aıtar edińiz ?
-Jastarǵa kóńilim tolady. Keıbireýleri negizgi quram oıynshysy bolýǵa daıyn. Ázirge olardyń esimderin atamaımyn. Bar aıtarym - komanda tizginin ustap qalatyn jaqsy fýtbolshylar bar. Tek osy qarqynynan taımaı, damylsyz jattyǵý kerek. Fýtbolda eńbeksiz jaqsy nátıje bolmaıdy. Qazir komanda jasaqtalý ústinde, ony kúsheıtý maqsatynda birneshe oıynshy jańadan alynady.
Eske sala keteıik, budan buryn «Aqjaıyqtyń» Túrkııada qandaı komandalarmen joldastyq kezdesý ótkizetinin jazǵan bolatynbyz.
Búgin oraldyq klýb Serbııanyń «Spartak» (Sýbotıtsa) komandasymen jasyl alańǵa shyǵady.
