Basty maqsat - halyqaralyq standarttardy ulttyq statıstıkalyq is júrgizýge ýaqytyly ári tolyq engizý - S. Áıimbetov
ASTANA. 28 qańtar. QazAqparat - Búgingi kúngi negizgi maqsat - halyqaralyq standarttardy ulttyq statıstıkalyq is júrgizýge ýaqytyly ári tolyq engizý. Al osy standarttardy engizý jumystaryn júzege asyrý kezinde halyqaralyq sarapshylarmen qatar statıstıkanyń túrli salalaryndaǵy otandyq sarapshylardy da tartý qajet. Búgin Parlament Májilisinde ótken Úkimet saǵatynda depýtat Seıitsultan Áıimbetov osylaı málim etti.
Depýtattyń aıtýynsha, Statıstıka agenttigi memleket pen qoǵamdy qajetti aqparatpen qamtamasyz etý úshin vedomstvolardyń statıstıkalyq kórsetkishterin bir júıege túsirýdi kózdeıtin Memlekettik josparlaý júıesiniń memlekettik statıstıkamen úılestirýin qamtamasyz etý jónindegi jol kartasyn der kezinde ázirlegen. «2012 jylǵy 10 shildede Elbasynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baıandamasynda Agenttikke Eńbek jáne halyqty áleýmettik qorǵaý, Ekonomıka jáne saýda, Aýyl sharýashylyǵy mınıstrlikterimen birlesip ózin-ózi eńbekpen qamtyǵandar tobyndaǵy eńbekke qabiletti halyqty jumyspen qamtýǵa qaraı oıystyrýdyń ádistemesin ázirleý jáne jumyssyzdyq deńgeıin aıqyndaý ádistemesin jetildirý jóninde tapsyrma berdi. Bizdegi derekter boıynsha, Agenttik Halyqaralyq eńbek uıymynyń standarttary men usynystary negizinde ádisnamany ázirlep te qoıǵan, biraq sapaly derekter alý úshin Agenttiktiń zertteletin úı sharýashylyǵy sanyn tıisti túrde qarjylandyrýdy ulǵaıta otyryp, ony 5 paıyzǵa deıin arttyrý jónindegi jumysyn qoldaý qajet dep esepteımiz. Munyń ózi jumyspen qamtý jáne jumyssyzdyq jónindegi derekterdi aýdandar jáne qalalar boıynsha toqsan saıyn jedel túrde alyp otyrýǵa múmkindik beredi. Ókinishke oraı, búgingi tańda bul kórsetkish nebary 0,5 paıyzdy quraıdy», - dedi S. Áıimbetov. Onyń aıtýynsha, áleýmettik-demografııalyq kórsetkishter boıynsha sapaly ákimshilik derekter usyný jumysyn kúsheıtý qajet. Munyń ózi soǵan jumsalatyn shyǵyndardy esepteý úshin tıimdi qural bolar edi.
«Sońǵy jyldary ishki týrızmniń ekonomıkalyq turǵydan mańyzdy ekendigi bizdiń uǵymymyzǵa dendep ene bastady. Sondyqtan Agenttiktiń ishki týrızmdi damytý úshin ózdiginen uıymdastyrylatyn týrızmdi baǵalaý ádistemesin engize otyryp, týrızm statıstıkasy boıynsha ádistemelik nusqaýlyqtar ázirleýi qajet dep esepteımiz. Túptep kelgende, elimizdiń ekonomıkany damytýdyń «jasyl» jolyna túsýi úshin «bolashaqtyń energııasyn» jasaýda ǵylym men ınnovatsııalyq tehnologııalardyń jetistikteri qýatty serpin beretinin aıta ketken jón. Osy máseleni sheshý jolynda Agenttik «jasyl ekonomıkany» engizý týraly statıstıkalyq aqparat alý úshin ınnovatsııalardy, energııa men resýrstardyń únemdelýin, energııanyń jańartylǵan kózderin engizýdi baǵalaý ádistemesin ázirleý jónindegi keshendi is-sharalardy qarastyrýy qajet», - dedi depýtat.
