Basty sebep — sapasyz qurylys: Qaza tapqan feldsher isinde sarapshy qasbettiń nege qulaǵanyn túsindirdi
ASTANA. KAZINFORM — Astanada jedel járdem feldsheri Uldana Myrzýannyń qazasyna qatysty sot protsesi jalǵasyp jatyr. Búgin «Astana-Tehnadzor» JShS sarapshysy Denıs Vorobev qaıǵyly jaǵdaıǵa qurylys sapasynyń tómendigi sebep bolǵanyn aıtty.
Mamannyń sózinshe, qasbettiń qulaýy aıaq astynan bolmaǵan, oǵan deıin aqaýlar uzaq ýaqyt boıy qordalanǵan.
— Qasbettiń qulaýyna birneshe faktordyń jıyntyǵy sebep boldy. Degenmen negizgi sebep retinde biz qurylys sapasynyń óte tómen bolǵanyn aıtyp otyrmyz. Sebebi keshe ótken sot otyrysynda negizgi sebep konstrýktsııalyq kemshilikter, ıaǵnı ǵımarattyń jobada kózdelgennen bıik etip salynýy degen nusqa aıtyldy. Alaıda Astanada bizde qabyrǵasy tolyqtaı kirpishten qalanǵan, qańqasyz júıe boıynsha salynǵan bıik úıler kóp. Olar qalypty jumys istep tur, mundaı problema joq. Sondyqtan basty sebep — qurylys sapasynyń óte tómen bolýy. Bizde zertteý kezinde túsirilgen foto jáne beınematerıaldar da saqtalǵan. Sol materıaldarǵa qarasaq, qabyrǵany qalaý sapasyn tolyqqandy kirpish qalaý dep ataýdyń ózi qıyn, — dedi D. Vorobev.
Onyń aıtýynsha, negizgi kótergish qabyrǵadaǵy kirpish qatarlarynyń ózara baılanysy da, qaptama qabatynyń negizgi qabyrǵamen baılanysy da talapqa saı oryndalmaǵan.
— Ekinshi mańyzdy másele — qalaý qatarlarynyń ózara durys baılanystyrylmaýy. Sonyń saldarynan qabyrǵa ishki kótergish qabatpen tolyq baılanyspaı, tik ornalasqan bıik ári bólek qabyrǵaǵa aınalǵan, — dedi maman.
Sonymen qatar onyń aıtýynsha, qalaý jikteriniń qalyńdyǵy birkelki bolmaǵan. Ýaqyt óte kele qaptama qabaty negizgi qabyrǵadan ajyrap, eki qabattyń arasyndaǵy sańylaý ulǵaıa túsken.
— Qaptama qabyrǵasy jeke turǵandyqtan, ol tıisti deńgeıde bekitilmegen. Óıtkeni sapaly eritindi qoldanylmaǵan, qalaý qatarlary da bir-birimen durys baılanystyrylmaǵan. Sonyń saldarynan qabattardyń arasyndaǵy sańylaý birtindep ulǵaıyp, aqyrynda qabyrǵa qulady. Onyń naqty qaı ýaqytta bolatynyn aldyn ala baqylap, dál aıtý múmkin emes edi, onyń ústine adamdar qurylys salasynyń mamany emes. Jaǵdaı osylaı órbigen jáne sońy osyndaı aýyr saldarǵa ákep soqty, — dedi sarapshy.
Buǵan deıin is boıynsha aıyptalýshy Sáýle Jubanııazova ózine qandaı jaǵdaıda aıyp taǵylǵanyn aıtqan edi.
Sondaı-aq, qasbeti qulaǵan úıde jańa jaryqshaqtar paıda bolǵany anyqtaldy.
