Basty mindetimiz - adamdardy qorǵaý úshin barlyq qajetti sharalardy qabyldaý
ÓSKEMEN. KAZINFORM – Búgin ShQO ákimi Nurymbet Saqtaǵanov jedel shtab quramyna kiretin beıindi vedomstvolar qyzmetkerlerimen sý tasqyny qaýpi bar jerlerge monıtorıng júrgizdi.

- Aýa raıynyń, kúndizgi jáne túngi temperatýranyń kúrt ózgerýine baılanysty jaǵdaıdy baqylaýda ustaý qajet. Ásirese, ózender mańaıy saǵat saıyn qadaǵalaýdy qajet etedi. Bizge naqty boljamdar men tolyq daıyndyq qajet, - dep atap ótti óńir basshysy.
Marqakólde Qaljyr ózeniniń arnasyn tazartý jáne túzetý, sý ótkizgish qubyrlardy ornatý boıynsha sý tasqynyna qarsy is-sharalar júrgizilip, Qaljyr jáne Marqakól aýyldaryna tóngen qaýip azaıdy. 72 sý ótkizý qurylymdary, 6 kópir, sondaı-aq aryqtar men kanaldar tazartyldy. Qara Ertis, Qaljyr ózenderinde muz keptelisterin boldyrmaý úshin búgingi monıtorıng aıasynda úsh arnaıy orynda profılaktıkalyq jarylys jumystary júrgiziletini anyqtaldy.

Orta Terekti, Laıly jáne Tómengi Taıynty bógetteri shtattyq rejımde jumys istep tur. Aımaqtyń barlyq derlik gıdroqurylymdary áli muz astynda. Sondyqtan bul nysandardyń jaǵdaıy saǵat saıyn baqylaýdy talap etedi.
Tarbaǵataıdyń 6 eldi mekeninde sý tasqyny qaýpi tolyǵymen joıyldy. Jańaýyl, Saryóleń, Qarasý, Jetiaral, Mańyraqta erigen sý tasqyny qaýpi tómendedi. Terisaıryq ózeni jaǵalaýyn nyǵaıtý jumystary júrgizildi. 182 sý ótkizý qurylymy, 9 kópir jáne 33 km sý kanaldary tolyǵymen qar men muzdan tazartyldy.
Kúrshim aýdanynyń 4 aýylynda sý tasqyny qaýipi tolyq joıyldy. Kúrshim-Topterek avtojolyndaǵy kópirge jóndeý jumystary júrgizildi. 441 sý qurylymy topan sýdy ótkizýge daıyn, 19 kópir, sondaı-aq aınalma aryqtar men kanaldar tazartyldy. Ózenderdegi muzdy qoparý úshin profılaktıkalyq jarylys jumystary júrgiziletin 2 ýchaske anyqtaldy.
- Oblystyń barlyq aýdandarynda kóktemgi tótenshe jaǵdaılardy joıýǵa arnalǵan kúshter men quraldar toby bar. Aýdan ákimderine úılestirilgen jumys júrgizýdi tapsyrdym. Sý deńgeıi jáne gıdrotehnıkalyq qurylymdardyń jaı-kúıi baqylaýǵa alynady. Kólik qatynasyn saqtaý úshin ásirese taýly jerlerdegi joldarǵa jáne kópirlerge erekshe nazar aýdarý qajet. Basty mindet - adamdar men ınfraqurylymdy qorǵaý úshin barlyq qajetti sharalardy qabyldaý, - dedi Nurymbet Saqtaǵanov.
Buǵan deıin ShQO-daǵy Buqtyrma ózeninde birneshe jarylys jasaldy.