Basty mindet – eńbek ónimdiligin arttyrý: Prezıdent ónerkásiptegi basty qaǵıdany atady
ASTANA. KAZINFORM – Aqordada Prezıdent Qasym-Jomart Toqaevtyń tóraǵalyǵymen Jasandy ıntellektini damytý jónindegi keńestiń úshinshi otyrysy ótti.
Jıynda ónerkásip sektoryn tsıfrlyq transformatsııalaý máseleleri qaraldy.
Memleket basshysy jasandy ıntellekt jańa tsıfrlyq dáýirde básekege qabilettilikti aıqyndaıtyn basty faktorlardyń birine aınalǵanyn atap ótti.
– BUU-nyń Ónerkásiptiń damýy týraly 2026 jylǵy esebine sáıkes, JI álem ekonomıkasynyń kelbetin ózgertetin bes transformatsııalyq megatrendtiń biri retinde tanyldy. Sońǵy bes jylda jasandy ıntellektimen baılanysty patentterdiń úlesi shamamen úsh ese ósken. Bul irgeli tehnologııalyq ózgeristerdi baıqatady. Endi tabıǵı resýrstar jáne kapıtal men naryq úshin ǵana emes, óndiris tıimdiligi úshin de básekelestik qyza tústi. Qazaqstan osy múmkindikterdi qalt jibermeýi qajet. Basty mindet – eńbek ónimdiligin arttyrý, tehnologııalyq jańǵyrýdy jedeldetý jáne qosylǵan quny joǵary ónim óndirýdi keńeıtý. Osy jumystardy atqarýda jasandy ıntellekt negizgi quraldardyń biri bolýǵa tıis, – dedi Prezıdent.
Qasym-Jomart Toqaev 2029 jylǵa deıingi Digital Kazakhstan strategııasy aıasynda naqty ekonomıkalyq nátıjege qol jetkizýdi kózdeıtin jasandy ıntellektiniń ulttyq keshendi ekojúıesi túzilip jatqanyna toqtaldy.
– Bıylǵy segiz aıda ónerkásiptegi óndiris kólemi 46 trıllıon teńgege jýyqtady. Óńdeý ónerkásibi byltyrǵy osy merzimmen salystyrǵanda 8,4 paıyzǵa ósti. Degenmen ekonomıkalyq ósimniń joǵary qarqynyn saqtaý úshin eńbek ónimdiligin arttyryp, ónerkásip bazasyn jańǵyrtýǵa jáne qosylǵan quny joǵary ónim óndirýge mán berý qajet. Bul maqsatqa jetýde jasandy ıntellektiniń atqaratyn róli aıryqsha. JI-diń shynaıy qundylyǵy sol – adam áleýetin kúsheıtedi. ıAǵnı JI ınjenerlerge naqty qadamdar jasaýǵa, jumys tıimdiligin ulǵaıtýǵa, basshylyqqa qajet kezinde dereý taldaý derekterine súıenip, jedel ári durys sheshim qabyldaýǵa múmkindik beredi. Ónerkásiptegi saıasatymyz osy qaǵıdatqa negizdelgen, – dedi Memleket basshysy.
Aıta keteıik, Prezıdent jasandy ıntellektiniń jastarǵa jan-jaqty damýǵa múmkindik berip otyrǵanyn aıtty.
