Basty máselelerdiń biri — óndiris obektileri men Jańaózendi sýmen qamtamasyz etý — Maǵzum Myrzaǵalıev
«QazMunaıGaz» UK AQ basshylyǵy enshiles jáne táýeldi uıymdarynyń óndiristik qyzmeti máseleleri boıynsha keńes ótkizdi. Bul týraly atalmysh kompanııanyń baspasóz qyzmeti habarlady.
«QazMunaıGaz» UK AQ Basqarma Tóraǵasy Maǵzum Myrzaǵalıev Aqtaý qalasyna jumys sapary barysynda Mańǵystaý oblysyndaǵy QMG enshiles jáne táýeldi uıymdarynyń (ETU) basshylarymen keńes ótkizdi.
Keńeske QMG Basqarma tóraǵasynyń orynbasary Nurseıit Soıýnov, «Qarajanbasmunaı» AQ, «Mańǵystaýmunaıgaz» AQ jáne «Ak Su KMG» JShS basshylary qatysty.
Kásiporyn basshylary óndiristik qyzmettiń negizgi kórsetkishteri, júzege asyrylyp jatqan ınvestıtsııalyq jobalar jáne eńbek ujymdarynda áleýmettik turaqtylyqty saqtaý máseleleri týraly baıandady.
M.Myrzaǵalıev kompanııalar men merdigerlik uıymdar ishindegi problemalarǵa ýaqtyly den qoıý úshin ujymdarmen jáne kásipodaqtarmen ózara is-qımyl jasaý úshin qajetti jaǵdaılardy jasaý jáne qoldaýdyń mańyzdylyǵyn atap ótti.
Keńes qorytyndysy boıynsha M.Myrzaǵalıev kásiporyndardyń úzdiksiz jumysyn, 2024 jylǵa arnalǵan óndiristik baǵdarlamalardyń oryndalýyn qamtamasyz etýdi, ilespe qabat sýyn tushytý zaýytynyń («Qarajanbasmunaı» AQ) jobalyq kórsetkishterge deıin jetkizýdi júzege asyrýdy, Jańaózen qalasyndaǵy tushytý zaýyty («Ak Su KMG» JShS) boıynsha jobalaý-smetalyq qujattamany "Memsaraptama" RMK-ǵa ýaqtyly usynýdy tapsyrdy.
«Búginde «QazMunaıGaz» úshin basty máselelerdiń biri — óndiris obektileri men Jańaózen qalasynyń turǵyndaryn sýmen qamtamasyz etý. Memleket basshysynyń qala turǵyndaryn aýyz sýmen qamtamasyz etý jónindegi tapsyrmasyn oryndaý aıasynda biz tushytý zaýytynyń qurylysyn bastadyq», — dedi QMG basshysy.
M.Myrzaǵalıev qaýipsizdik tehnıkasy, eńbek tártibi, Eńbekti jáne qorshaǵan ortany qorǵaý erejelerin qatań saqtaýdy tapsyrdy.
