Basty másele Máskeý men Kıevtiń tikeleı dıalogy arqyly sheshilýi tıis – saıasattanýshy

ASTANA. KAZINFORM – Saıasattanýshy, halyqaralyq konmmýnıkatsııalar jónindegi sarapshy Azamat Baıǵalıev Ankorıdjde (Alıaska, AQSh) AQSh prezıdenti Donald Tramp pen Reseı prezıdenti Vladımır Pýtın arasyndaǵy kelissózderdiń qorytyndysyna qatysty pikirin bildirdi.

– Tramptyń «mámilege kelmedik» degen basty dáıeksózi kelissózderdiń qalaı bolǵanyn aıqyn kórsetedi. Ókinishke qaraı, keremet nátıje bolmady, - dep atap ótti sarapshy.

Onyń paıymynsha, eleýli nátıjelerge úmit artý – áli erte.

– Keıingi jyldary alǵash ret bolǵan Pýtınniń AQSh-qa qysqa merzimdi sapary birden naqty nátıjeler ákeledi dep sený artyq bolar edi. Taraptar bir-birine qaraı mańyzdy qadam jasady. Biraq ázirge irgeli ymyraǵa kelýge daıyn emes, - dedi Azamat Baıǵalıev.

Saıasattanýshy sondaı-aq kelissózderdi uıymdastyrý erekshelikterine nazar aýdardy. Ol keńeıtilgen baspasóz konferentsııasy men túski astyń bolmaǵanyna qarap, kelissózder jospar boıynsha ótpegen syńaıly degen pikirin aıtty.

– Kezdesý kestesi jaǵdaıǵa baılanysty ıkemdi túrde quryldy. Sebebi taraptar ázirge bir-birinen ne kútýge bolatynyn tolyq túsinbeıdi, - dedi ol.

Buǵan deıin Fox telearnasyna bergen suhbatynda Tramp naqty nátıjelerge qol jetkizilmegenin moıyndaǵan edi.

Sarapshynyń pikirinshe, qaqtyǵystyń basty problemasy tikeleı kelissózder arqyly sheshilýi tıis.

– Qaqtyǵystyń basty problemasy Máskeý men Kıev arasyndaǵy tikeleı kelissózder formatynda, Vashıngtonnyń sózsiz tikeleı aralasýymen sheshilýi kerek, - dep atap ótti saıasattanýshy.

Sonymen birge ol taraptardyń dıalogty jalǵastyrýǵa nıetti ekenin oń kórsetkish retinde baǵalady.

– Aq úı men Kreml áli de bolsa kelissózderdi jalǵastyrýǵa, onyń ishinde kezdesýdi Ýkraına men Eýroodaqtyń qatysýymen keńeıtilgen formatta ótkizýge úmittenip otyr. Bul óte oryndy. Óıtkeni mynadaı buljymaıtyn ereje bar: kez kelgen qaqtyǵysty tar aıada bastaý ońaı, biraq ony aıaqtaý óte qıyn. Ol úshin barlyq múddeli tarap qatysýy qajet, - dedi sarapshy.

Qorytyndylaı kele, Baıǵalıev máseleni beıbit túrde retteý óte kúrdeli protsess ekenin jáne Ýkraına men Reseı arasyndaǵy áskerı qaqtyǵysty sheshýdiń jeńil joldary joqtyǵyn aıtty.

– Barlyq tarap eń eleýli ymyraǵa daıyn bolǵanda ǵana naqty beıbit nátıjelerge qol jetkizýge bolady. Ankorıdjdegi kezdesýden soń onyń múmkindigi óte az ekenin de moıyndaıyq. Biraq bul beıbit kelissózderden bas tartý kerek degendi bildirmeıdi. Kerisinshe, kelesi raýndqa áldeqaıda tereń ári batyl daıyndyq qajet ekenin, sondaı-aq qaqtyǵysty retteýge qatysy bar barlyq tarapty tartý kerektigin kórsetedi, - dep túıindedi sózin saıasattanýshy.

Óz kezeginde saıasattanýshy Qazbek Maıgeldınov Pýtın-Tramp kezdesýi halyqaralyq shıelenisti azaıtý jolyndaǵy dıplomatııalyq qadam dep baǵalaǵan edi.

Buǵan deıin úsh saǵatqa jýyq ýaqyt kelissóz júrgizgen Tramp pen Pýtın kelisimge kele almaǵanyn jazǵan edik.