Bástesýge daıynmyn – Jaslan Mádıev jýrnalısterdi ınternet baǵasy túskenine sendire almaı ketti
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Májilis kýlýarynda jýrnalıstermen ınternet baǵasy tarıfi týraly uzaq pikir talastyrdy.
- Internet baǵasy týraly aıtsaq, 2024 jyly 1 Gbaıt trafıktiń baǵasy arzandatyldy. Mobıldik baılanystaǵy ınternet trafıgi shamamen 12 paıyz, al bekitilgen tarıfter 25 paıyz arzandady. Men ony naqty sandarmen dáleldep bere alamyn, - degen mınıstr sol sátte-aq jýrnalıster aldynda ol ýájin dáleldeıtin naqty málimetter qolynda joq ekenin aıtyp, aqtaldy.
Vedomstvo basshysy qyzdy-qyzdymen bul másele boıynsha jýrnalıstermen bástesýge daıyn ekenin aıtty.
- Bálkim, siz burynǵydan kóp tólep júrgen shyǵarsyz. Biraq 1Gbaıt trafık úshin tólegen aqshańyzdy bólip qarasańyz, shynymen de arzandaǵanyn kóretin edińiz. Tipti bekitilgen tarıf aıasynda 1 Mbıt/sekýnd ólshemimen alyp esepteseńiz, bul jerde arzandaı túsken. Eger aı saıyn tarıfter qymbattap jatsa, tutynatyn ınternettiń kólemi artty degen sóz. Men sizdermen bástese alamyn. 1 Gbaıt ınternettiń baǵasy burynǵydan arzan, - dedi ol.
Aıtýynsha, ınternettiń absolıýtti qunyna áser etetin kóptegen faktor bar.
- Onyń ishinde ınflıatsııa da, ınvestıtsııalyq baǵdarlamalardyń shyǵyny da, baǵany aqyldasyp belgileý de bar. Tıisti agenttik ol boıynsha tekserý júrgizip jatyr. Qymbat qondyrǵylar satyp alǵan bolýy múmkin. Qazaqstanda óndirilmegen qondyrǵy satyp alynsa, teńge qunsyzdanǵan kezde onyń bári trafık qunyna áser etedi. Qazaqstanda trafık júktemesi aıtarlyqtaı ósip jatyr. Internet tutyný kólemi artqan saıyn mobıldik operatorlardaǵy shtat sany da ósip jatyr. Taldaýlar mobıldik baılanystyń ınternet baǵasy bir jylda 11,8 paıyz arzandaǵanyn kórsetip otyr. Qazaqstandyqtar ortasha eseppen aı saıyn 20 Gbaıttan astam ınternet tutynady. Qurmetti jýrnalıster men sizderge aıtarlyqtaı egjeı-tegjeıli jaýap berdim dep oılaımyn. Keıin qosymsha taldaýdy usyna alamyz, - dep túıindedi Jaslan Mádıev.
Eske salsaq, bıyl naýryzda KCell, Tele2, Beeline kompanııalarynyń ústinen tarıf kóterý týraly «sóz baılasý» kúdigimen tekserý bastalǵan edi. Biraq 22 mamyrda ol tekserý toqtatylǵany málim boldy.