Bastaýysh synyp oqýshylaryn ystyq tamaqpen qamtamasyz etý barlyǵy úshin mindetti emes - J.Túımebaev
STANA. Tamyzdyń 27-si. QazAqparat /Marlan Jıembaı/ - Bastaýysh synyp oqýshylaryn ystyq tamaqpen qamtamasyz etý barlyǵy úshin mindetti emes. Bul týraly búgin QR Bilim jáne ǵylym mınıstri Janseıit Túımebaev BNews.kz portalynda «Qazaqstandaǵy bilim berý: múmkindikteri, keleshegi, ınnovatsııalar» taqyrybynda ótken on-laın konferentsııa barysynda málim etti.
«Bastaýysh synyp oqýshylaryn ystyq tamaqpen qamtamasyz etý barlyǵy úshin mindetti emes», degen mınıstrdiń sózine qaraǵanda, atalǵan shara áleýmettik turmysy tómen otbasynan shyqqan balalarǵa, ıaǵnı jekelegen oqýshylarǵa kórsetiledi. Alaıda mınıstr bul máselede jergilikti atqarýshy organdardyń, ákimdikterdiń qol ushyn berip otyrǵandyǵyn basa aıtty. Osyǵan oraı birqatar oblystardaǵy ákimderdiń aralasýymen 1-4 synyp oqýshylaryn tolyq ystyq tamaqpen qamtamasyz etý uıymdastyrylǵan. Tipti keıbir óńirlerde 5-7-shi synyp oqýshylary da mektep qabyrǵasynda tegin aýqattanýǵa múmkindik alyp otyr.
«Alaıda mindetti túrde barlyq mektepterde býfetter men ashanalar jumys isteıdi. Eger salystyra qarasa, álemdik tájirıbede de barlyq mektepter 100 paıyz qamtylmaǵan. Bul tek qana aqyly mektepterge ǵana tán», dedi J.Túımebaev.
Sonymen qatar Bilim jáne ǵylym mınıstri taıaýda elorda pedagogteriniń tamyz keńesine qatysqandyǵyn, onda qala basshysy Imanǵalı Tasmaǵambetovtiń aǵymdaǵy jyly jergilikti bıýdjet qarjysy esebinen 1-4-shi synypta oqıtyn oqýshylarǵa tegin ystyq tamaq uıymdastyrylatyndyǵyn atap ótkendigin eske saldy.
