Bastaýysh muǵalimi MMA-dan Qazaqstan namysyn qorǵaý úshin Bahreınge attanady
ASTANA. QazAqparat - Taldyqorǵan mektepteriniń birinde bastaýysh synypqa sabaq beretin Gúlmıra Nuǵymanova Qazaqstan namysyn qorǵaý úshin Bahreınde MMA sport túrinen ótetin álem chempıonatyna attanyp barady, dep habarlaıdy «QazAqparat» HAA tilshisi QR MMA federatsııasynyń baspasóz qyzmetine silteme jasap.
Gúlmıra Nuǵymanova - Taldyqorǵandaǵy mektepterdiń birinde qarapaıym bastaýysh synyp muǵalimi bolyp eńbek etetin názik boıjetken. Degenmen, Gúlmıra sportpen burynnan shuǵyldanady. Eń qyzyǵy, ol sporttyń eń kúrdeli túrine jatatyn MMA-ny tańdaǵan.
Tóbeles ónerine degen súıispenshilik Gúlmırada bala kezinen paıda bolypty. Boıjetkennen keıin ol djıý-djıtsýmen shuǵyldanyp, ulttyq sport túrleriniń qataryndaǵy jekpe-jekten de shyńdala bastaǵan. Tipti pankratıonnan álem chempıonatynyń qola júldegeri atanǵan kezi de bolǵan.
Osy ýaqytqa deıin Gúlmıra UFC juldyzdarynyń jeńisi men jeńilisin baqylaı otyryp, bir kúni MMA-ǵa aýysýǵa bel sheshipti. Qazaqstandaǵy MMA erejesine sáıkes, qyzdardyń bul sport túrimen aınalysýyna tek bıylǵy jyly ǵana ruqsat etilgen. Gúlmıra óziniń bapkeri, Almaty oblysynyń MMA boıynsha aǵa jattyqtyrýshysy Nurlan Amanqulovtyń arqasynda ózin kórsetip, álem chempıonatynda Qazaqstannyń atynan óner kórsetýge laıyqty ekenin dáleldegen. Endigi kezekte Gúlmıra Qazaqstan ulttyq quramasynyń sportshylarymen birge 12-19 qarasha aralyǵynda Bahreın astanasy Manama qalasynda ótetin álem chempıonatyna attanǵaly jatyr.
«Munda ýaqyt joq. Kúndelikti jattyǵý, dámdi tamaq pen keste boıynsha uıqy - bárimiz jeńiske bekinip otyrmyz. Qazaqstan MMA federatsııasynyń sheshimi boıynsha, lagerge túrli jattyqtyrýshylar kelip, árkim óz tehnıkasyn, óz mektebin tanytyp jatyr. Sonymen birge, sportshylar arasynda myǵym dostyq bar. Kez kelgen MMA sheberine baryp, qandaı daǵdylardy úırenýge bolatyny týraly keńes suraı alamyz. Qyzdardan ekeýimiz ǵana. Biz Aıan Tursynmen dostasyp kettik. Greplıng boıynsha Ernaz Musabek kómegin aıaǵan emes. Ol bul turǵyda kásibı túrde myqty ekenin atap ótkim keledi. Biraq, shyny kerek, maǵan jattyqtyrýshy Nurlan Amanqulovtyń keńesi jetpeı tur. Ol qazir óziniń shákirti Arman Áshimovpen Máskeýde júr. 10 qarasha kúni Arman M-1 Challenge-85 týrnırinde sharshy alańǵa shyǵady. Biraq, Bahreınge birge baramyz. Maǵan onyń daýysyn estip, qoldaý baryn bilý óte mańyzdy», - deıdi Gúlmıra.
Sport degen kúnniń ózinde de Gúlmıra sharshy alańda eń aldymen, aqylǵa júginý durys dep bilip, shaıqasty shahmatpen salystyrady.
«Men bul sportty unatamyn. Munda shahmat sııaqty árqashan oılanýyń kerek. Shaıqas strategııasyn qalyptastyrasyz. Soqqyny jiberip alsańyz boldy - jeńildim deı berińiz», - deıdi Gúlmıra.
Muǵalimdik mamandyqty Gúlmıra sanaly túrde tańdap alǵan. Ol balalardy óte jaqsy kóretinin, oqýshylardyń ustazǵa degen qurmeti erekshe ekenin aıtady. MMA sport túrine bekingenin óziniń aınalasyndaǵy adamdar qalaı qabyldaǵanyna qatysty suraqqa alǵashynda bári de ańtarylyp qalǵanyn, keıin úırenip ketkenin alǵa tartady.
«Jattyǵý lagerine barar aldynda biz ata-analar jınalysyn ótkizdik. Ata-analar maǵan batasyn berip, Bahreındegi álem chempıonatynda sátti óner kórsetýimdi tiledi», - deıdi Gúlmıra.
Burymdy qyz aldaǵy ýaqytta pedagogıka salasynda jumysyn jalǵastyrýdy josparlap otyr. Bıyl magıstratýrany bitirgen. Bilimmen birge, sport salasynda júrý - basty maqsaty ekenin aıtady.
