Bastaýysh mekteptegi oqýshynyń bir kúngi oqýlyǵynyń salmaǵy 1,5-2 keliden aspaýy kerek - BǴM
ASTANA. QazAqparat - Bastaýysh mekteptegi oqýshynyń bir kúngi oqýlyǵynyń salmaǵy 1,5-2 keliden aspaýy kerek. Bul týraly búgin Parlament Májilisinde «Oqýshylardy oqýlyqtarmen jáne oqý-ádistemelik keshendermen qamtamasyz etý problemalary men sheshimderi» taqyrybynda ótken Úkimet saǵatynda Bilim jáne ǵylym mınıstri Aslan Sárinjipov málim etti.
«1-4 synyptarǵa arnalǵan oqýlyqtyń salmaǵy 300 gramnan, 5-6 synyp oqýlyqtary 400 gramnan, al 7-10 synyptar oqýlyǵy 500 gramnan aspaýy kerek. Al 11 synyptarǵa arnalǵan oqýlyqtyń salmaǵy alty júz gramnan aspaýy shart. Buǵan qosymsha, bir oqýshynyń bir kúnge arnalǵan oqýlyqtarynyń salmaǵy bastaýysh mektepte 1,5-2 keliden aspaýy kerek. Al segizinshi, toǵyzynshy synyptarda tórt keliden aspaýy tıis», dedi Aslan Sárinjipov.
Óz kezeginde Sanıtarlyq-epıdemologııalyq qadaǵalaý komıtetiniń tóraǵasy Jandarbek Bekshın byltyrǵy jyly 3-10 synyptardyń oqýlyqtary osy máseleler boıynsha tolyqtaı teris qorytyndyǵa ıe bolǵanyn alǵa tartady. «Fızıka, algebra, bıologııa pánderiniń oqýlyǵy sanıtarlyq talaptarǵa saı emes, bulardyń salmaǵy artyp ketkendikten biz bir oqýlyqty ekige bólýdi usyndyq. Bir kúndik sabaq kestesiniń oqýlyqtary 1-3 synyptar úshin 2 keliden aspaýy kerek. 8-9 synyptardyń bir kúndik oqýlyǵy 4,5 keliden aspaýy shart edi. Qazirgi ýaqytta bulaı bolmaı otyr», dedi J. Bekshın.
