Bastaýysh bilimge qatysty jahandyq ındeks: Qazaqstan álemde 4-orynda
ASTANA. QazAqparat - Qazaqstan Básekege qabilettiliktiń jahandyq ındeksinde bastaýysh bilimmen qamtý kórsetkishi boıynsha álemde 4-orynǵa shyqty. Bul týraly búgin Astanada halyqpen eseptik kezdesý ótkizgen QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Biraz jaqsy jańalyǵymyz bar, onyń ishinde eń mańyzdylaryn atap óteıin. Birinshi, Qazaqstan EYDU-nyń eki komıtetine - bilim jáne ǵylym boıynsha múshe boldy. Ekinshi jańalyq, Qazaqstan Básekege qabilettiliktiń jahandyq ındeksinde bastaýysh bilimmen qamtý kórsetkishi boıynsha álemde 4-orynǵa shyqty. Jáne bárińiz bilesizder, osy jyldyń basynan bastap, eń aldymen, jańartylǵan mazmunǵa kóshken muǵalimderdiń jalaqysyna 30 paıyz qosymsha aqy tóleýdi qarastyrdyq. Endi sheberlik úshin muǵalimderdiń aılyqtaryn taǵy kóterý úshin testileý mehanızmderin engizý qajet», - dep atap ótti mınıstr.
Osy rette mınıstr Elbasy Nursultan Nazarbaevtyń 5 áleýmettik bastamasynda stýdentterdiń jatatyn oryndaryn sheshý máselesi kóterilip, stýdentterge qosymsha 20 myń grant boıynsha naqty tapsyrma berilgenin eske saldy. Sonymen qatar Elbasyna bilim salasyna arnaıy nazar aýdaryp, qoldaý kórsetkeni úshin oqýshylardyń, stýdentterdiń, muǵalimderdiń, ata-analardyń atynan rahmet aıtty.
«Tórt jylǵa arnalǵan Bilim jáne ǵylym memlekettik baǵdarlamasynyń úshinshi jyly oryndalýda. Birqatar kórsetkishterge qol jetkizdik. Sheshilmegen máseleler boıynsha tıisti sharalar qabyldap jatyrmyz. Jaqyn arada baǵdarlamany oryndaý nátıjesi boıynsha Prezıdent Ákimshiligi bizge jaqsy, pozıtıvti baǵa berdi», - dedi Erlan Saǵadıev.
