Bastaýysh synyptarda buryn baǵalanbaǵan pánder boıynsha da baǵalaý júrgiziledi
ASTANA. KAZINFORM – 1 qyrkúıekten bastap bastaýysh synyp oqýshylarynyń oqý nátıjeleri barlyq oqý pánderi boıynsha baǵalanady. Buǵan deıin jeke baǵalanbaǵan tsıfrlyq saýattylyq, eńbekke baýlý, beıneleý óneri, mýzyka jáne dene shynyqtyrý pánderi boıynsha da formatıvtik baǵalaý júrgizilip, aralyq baǵalaý toqsanyna bir ret ótkiziledi.
Bul týraly QR Oqý-aǵartý birinshi vıtse-mınıstri Shynar Aqparova málimdedi.
Onyń aıtýynsha, atalǵan pánderdiń barlyǵy bastaýysh bilim berýdiń jalpy mazmunyna kiredi jáne balanyń belgili bir bilimi men daǵdylaryn qalyptastyrýǵa baǵyttalǵan. Sondyqtan oqý baǵdarlamasynda belgilengen nátıjelerdiń barlyq pán boıynsha kórinis tabýy mańyzdy.
Bul qosymsha jazbasha baqylaý jumystaryn kóbeıtpeıdi. Kerisinshe, pánniń ereksheligine sáıkes sabaq barysynda oryndalatyn praktıkalyq, shyǵarmashylyq, jobalyq, zertteý, sporttyq, jeke jáne komandalyq jumystardyń nátıjesine negizdeledi, – dedi Shynar Aqparova Ortalyq kommýnıkatsııalar qyzmetiniń alańynda.
Birinshi vıtse-mınıstr Tsıfrlyq saýattylyq jáne jasandy ıntellekt pánine de toqtaldy.
Onyń aıtýynsha, bıyl pánniń mazmuny jańartylyp, oqýshynyń tsıfrlyq ortada qaýipsiz áreket etýi, aqparatpen jumys isteýi, tsıfrlyq quraldardy jaýapty paıdalanýy jáne jasandy ıntellekt múmkindikterin sanaly qoldanýy eskeriledi.
Al Eńbekke baýlý páni arqyly oqýshy jumysty josparlaý, materıaldar men quraldardy durys paıdalaný, bastaǵan isin sońyna deıin jetkizý, uqyptylyq tanytý jáne óz eńbeginiń nátıjesine jaýapkershilikpen qaraý daǵdylaryn qalyptastyrady.
Beıneleý óneri shyǵarmashylyq oılaýdy, vızýaldy qabyldaýdy jáne óz ıdeıasyn beıneleý quraldary arqyly jetkizýdi damytýǵa baǵyttalǵan.
Mýzyka páninde oryndaýshylyq jáne shyǵarmashylyq qabiletter, estý men yrǵaq sezimi, sondaı-aq emotsıonaldyq qabyldaý eskeriledi.
Al dene shynyqtyrý páninde oqýshynyń nátıjesi basqa balalarmen salystyrylmaıdy. Munda onyń qımyl-qozǵalys daǵdylaryn meńgerýi, qaýipsizdik talaptaryn saqtaýy, jeke jáne komandalyq jumystarǵa qatysýy baǵalanady.
– Osylaısha, barlyq pán boıynsha baǵalaý balanyń tek akademııalyq bilimin emes, onyń tsıfrlyq, praktıkalyq, shyǵarmashylyq, oryndaýshylyq jáne qımyl-qozǵalys daǵdylaryndaǵy ilgerileýin de kórsetýge múmkindik beredi, – dep qorytyndylady spıker.
Aıta keteıik, mekteptegi aralyq baǵalaý ne úshin kerek ekenin jazǵanbyz.
