Bastaýysh synypta BJB men TJB nelikten alynyp tastaldy
ASTANA. KAZINFORM – Jańa oqý jylynan bastap 1-4 synyp oqýshylarynyń bilimin baǵalaý júıesi ózgeredi. 1 qyrkúıekten bastap bastaýysh synyptarda burynǵy formattaǵy BJB men TJB qoldanylmaıdy. Onyń ornyna oqý maqsattaryna sáıkes jeńildetilgen baqylaý jumystary engiziledi. Bul ózgeristiń negizgi sebebin Jibek Joly telearnasyndaǵy «Búgin.LIVE» baǵdarlamasynda Astana qalasy Bilim basqarmasy Ádistemelik ortalyǵynyń ádiskeri Aqmaral Bolatqyzy aıtty.
– Zertteý barysynda balalardyń emotsıonaldyq jáne fızıkalyq turǵydan da júktemesi baıqaldy. Muǵalimder tarapynan da BJB men TJB artyq júkteme ekeni aıtyldy. Sol sebepti baqylaý jáne aralyq baqylaý jumystary jeńildetilgen formatta engizilip otyr, – dedi Aqmaral Bolatqyzy.
Mamannyń aıtýynsha, bul bastaýysh synyptarda baqylaý jumystary múlde bolmaıdy degen sóz emes. Oqýshylardyń bilimi burynǵydaı oqý baǵdarlamasy men oqý maqsattaryna sáıkes baǵalanady. Tek tapsyrmalardyń formaty jeńildetiledi.
– Tolyǵymen burynǵy formattan bas tarttyq dep aıta almaımyz. Baǵdarlamaǵa jáne oqý maqsattaryna saı baqylaý jumystary jasalady. Qazir olardyń úlgileri ázirlenip, talaptary qurylyp jatyr. Biraq burynǵyǵa qaraǵanda jeńildetilgen formatta engiziledi, – dedi ol.
Jańa júıede baqylaý jumystarynyń baǵalary elektrondy jýrnalǵa engiziledi. Mektepke qaraı bul «Kúndelik» nemese «Bilim Al» júıesi bolýy múmkin. Oqýshynyń kúndelikti sabaq barysynda alǵan baǵalary men baqylaý jumystarynyń nátıjesi negizinde qorytyndy baǵa avtomatty túrde shyǵarylady.
Ádiskerdiń sózinshe, baqylaý jumystarynyń burynǵydaı birneshe paraqtan turatyn kúrdeli formatta bolýy mindetti emes. Oqýshylar keı tapsyrmalardy tikeleı dápterge oryndaýǵa múmkindik alady.
– Buryn dıktant, mazmundama sııaqty jumystardy oryndaý formaty bolǵan. Mundaı tapsyrmalardy balaǵa oryndaý áldeqaıda jeńil. Onyń ózine degen senimi de artady. Sondyqtan emotsıonaldyq turǵydan oqýshyǵa úlken júkteme túspeıdi. Muǵalimderdiń saǵat sany ózgermeıdi, biraq jumys kólemi azaıady. Buryn BJB men TJB úshin ár balaǵa birneshe paraq tapsyrma shyǵaryp, kúrdeli baǵalaý talaptaryn qoldaný kerek edi. Qazir onyń bári jeńildetilip, balalar baqylaý jumystaryn dápterge oryndaýǵa múmkindik alyp otyr, – dep túıindedi Aqmaral Bolatqyzy.
Aıta keteıik, buǵan deıin balanyń mektepke daıyndyǵyna qatysty psıholog keńesin jazǵan edik.
