Bastaýysh synyp oqýshylaryna jasandy ıntellektini úıretýdiń qajeti bar ma
ASTANA. KAZINFORM – Bastaýysh synyp oqýshylaryna jasandy ıntellekt týraly bastapqy túsinik berý olardyń tsıfrlyq ortada qaýipsiz ári sanaly áreket etýine baǵyttalady. Bul týraly Y. Altynsarın atyndaǵy Ulttyq bilim akademııasy orta bilim ınstıtýty dırektorynyń orynbasary Pernegúl Taýbaı jýrnalısterdiń suraǵyna jaýap berdi.
Jýrnalıst mamannan bastaýysh synyp oqýshylaryna jasandy ıntellektti oqytýdyń qanshalyqty qajet ekenin jáne jańa pán mazmuny qazirgi tsıfrlyq ózgeristerge qanshalyqty beıimdelgenin surady.
Pernegúl Taýbaıdyń aıtýynsha, 1-4-synyptarda buryn oqytylyp kelgen «Tsıfrlyq saýattylyq» páni «Tsıfrlyq saýattylyq jáne jasandy ıntellekt» bolyp ózgertiledi. Bul rette pánniń ataýy ǵana emes, mazmuny da jańartylady.
– Búginde balalar jasandy ıntellektti óz deńgeıinde qoldanyp júr. Sondyqtan pedagogtiń basshylyǵymen olarǵa birden kúrdeli tsıfrlyq quraldarmen jumys isteý emes, aldymen jasandy ıntellekt týraly qarapaıym túsinikter men alǵashqy uǵymdar beriledi, – dedi ol.
Onyń aıtýynsha, jasandy ıntellektti qaýipsiz qoldanýdy úıretý bastaýysh synyptardaǵy basty baǵyttardyń biri. Jańa baǵdarlamada medıasaýattylyq pen jasandy ıntellektke qatysty arnaıy bólim engizilip, onda 13-14 oqý maqsaty qamtylǵan. Atap aıtqanda, oqýshylarǵa jeke derekter men aqparatty qorǵaý, tsıfrlyq qaýipsizdik, jasandy ıntellektti jaýapkershilikpen paıdalaný jáne etıkalyq talaptardy saqtaý túsindiriledi.
Al 5-9-synyptarda bul taqyryptar «Informatıka» pániniń mazmunyna kiriktiriledi. Atap aıtqanda, derekterdi óńdeý, medıasaýattylyq jáne kıberqaýipsizdik baǵyttary qamtylady.
– Ár synyptyń jas ereksheligine qaraı tsıfrlyq saýattylyqtyń bastapqy deńgeıleri, jasandy ıntellektti durys paıdalaný, akademııalyq adaldyqty saqtaý, qaýipsizdik jáne sanaly qoldaný daǵdylary oqý baǵdarlamalaryna engiziledi, – dedi Pernegúl Taýbaı.
Sonymen qatar pedagogter úshin jańa baǵdarlamalardy oqytýǵa arnalǵan ádistemelik usynymdar ázirlengen. Onda jasandy ıntellektke qatysty taqyryptardy sabaqta qoldaný tásilderi men naqty úlgiler usynylady. Akademııa ókiliniń aıtýynsha, oqý jyly barysynda pedagogterge ádistemelik jáne túsindirý jumystary da júrgiziledi.
Aıta keteıik, elimizde bıyl bastaýysh synyptarda baǵalaýdyń jańa tásilderi engiziledi.
