«Bastaý» jobasy: Túrkistan oblysynda 3 myń adam kásipkerlikti úırenedi
TÚRKІSTAN. QazAqparat – Túrkistan oblysynda «Atameken Academy» platformasynda «Bastaý» jobasymen onlaın rejımde kásipkerlerlikke oqytý bastaldy. Bul týraly Túrkistan oblysy Kásipkerler palatasy baspasóz qyzmeti málimdedi, dep habarlaıdy QazAqparat tilshisi.
Óńirlik Kásipkerler palatasynyń baspasóz hatshysy Aıkóz Syzdyqovanyń aıtýynsha, bıznes-trenerler oblystyń 16 aýdan-qalasynda qatysýshylarǵa Palatanyń 14 kásipkerlik negizderin úıretýde. Olarǵa osy baǵytta keńes berýde. Bıyl oblys boıynsha 3100 adamdy oqytý josparlanyp, onlaın oqytý 5 kezeńnen ótkiziledi.
«Birinshi kezeńde Atameken Academy jáne Openstudy.kz saıttarynda tirkelgen qatysýshylar ár topqa bólinip, 12 modýl boıynsha 50 beıne-sabaqty ıgerip, 12 testiden ótedi. Kásipkerlik negizderi jónindegi kýrs aýqymy keń, atap aıtqanda áleýetti jobalardan bastap, bıznesti áleýmettik jeliler arqyly ilgeriletý, merchendaızer negizderi, qarjylyq saýattylyq, jobalarǵa ınvestıtsııa tartýǵa deıingi jáne basqa da baǵyttarda óz bilimderin arttyratyn bolady», - dedi Aıkóz Syzdyqova.
Kýrsty tıimdi qabyldaý maqsatynda beıne-sabaqtar, slaıdtar, tanystyrylymdar, sonymen qatar salalyq sarapshylardyń qatysýymen vebınarlar, tehnolog mamandardyń qatysýymen sheberlik sabaqtar qarastyrylǵan. Ár jańa taqyryp tyńdaýshynyń ózindik jumysymen tııanaqtalady. Jeke qabiletti synaý úshin onlaın-skorıng qarastyrylǵan. Ár týyndaǵan másele boıynsha qatysýshy óz bıznes-trenerine júgine alady.
«Bıylǵy jyly jobany júzege asyrýdyń ereksheligi, Bıznes-trenerlerdiń qoldaýy tek túlekterdiń bıznes-jobalaryn qarjylandyrýmen shektelmeıdi. Bıznes-trenerler men Kásipkerler palatasy tyńdaýshylardyń jobalaryn óndiristik-ótkizý tizbekterine ornalastyrý úshin súıemeldeıtin bolady. Bul degenimiz kásipkerler óz ónimderin nemese qyzmetterin qaıda ótkizetinin oılap, alańdamaıtyn bolady. Qazirgi tańda jobanyń bıznes-jattyqtyrýshylary ár aýdannyń ereksheligine sáıkes aımaqtarda naryqtyq zertteýler ótkizip, «Bastaý» jobasynyń túlekterimen ári qaraı yntymaqtastyq ornatý úshin 50-den astam kásiporynmen kelissózder júrgizdi. Jobaǵa qatysyp, tolyq aqparat alý úshin 8701-794-25-49 nómirine habarlasýǵa bolady»,- dedi Aıkóz Syzdyqova.
Aınur Aqbaeva
Sýreti poshtada
