«Bastaý» kınofestıvalinde Maks Akbarovtyń debıýttik rejısserlik jumysy kórsetildi
«Bastaý» kınofestıvali aıasynda «Arman» kınoteatrynda Maks Akbarovtyń «Dala» atty fılminiń qazaqstandyq premerasy ótti. Ataqty prodıýser jáne akterdiń debıýttik rejısserlik jumysy Bastau Debuts baıqaýyna qatysyp jatyr, dep habarlaıdy Kazinform.
Kartına Qazaqstan dalasyndaǵy brakonerlermen kúreske túsken tabıǵatty qorǵaý ınspektorlarynyń oqıǵasyn baıandaıdy. Fılm 2019 jyly brakonerlermen arpalysta erlikpen qaza tapqan ınspektorlar Erlan Nurǵalıev pen Qanysh Nurtazınovty eske alýǵa arnalǵan.
Fılm kóp ýaqyttan beri halyqaralyq kórmelerge qatysty. «Dalany» álem boıynsha 20-ǵa jýyq kınofestıvaldiń kórermenderi baǵalap úlgerdi. Ázirshe avtorlardyń qorjynynda 11 júlde bar. Endi mine kıno otandyq kıno súıer qaýymǵa da jetti.
«Bul – áleýmettik mańyzy bar fılm, biz ony kınofestıvalderge barady dep oılaǵan joqpyz. Túsirilimniń ózi óte qyzyqty, erekshe boldy. Ásirese men úshin. Sebebi bul – meniń rejısserlik debıýtim. Qıyn sátter de boldy, biz qysta mınýs 47 gradýsta túsirdik, boran boldy, dalada birneshe saǵatta akterlarymyz adasyp ketti. Jazda plıýs 50-de túsirildi, onǵa jýyq kólik buzyldy. Ekshn kóp boldy. Osyndaı ekstremaldy kadrlardyń arqasynda biz Londondaǵy International MOTOR AWARDS kınofestıvaline qatystyq, onda sońǵy «Forsajben «Úzdik kaskaderlik trıýkter» nomınatsııasynda boldyq», - dedi debıýtant Maks Akbarov.
73 mınýttyq qysqa hronometrajǵa qaramastan, kartınada óte myqty akterlik quram boldy. Kadrdyń ár sharshy metri úshin Dáýren Serǵazın, Erjan Túsipov, Tólepbergen Baısaqalov, Erbolat Alkoja, Nyshanbek Jubanaev, Sergeı Ýfımtsev, Erjan Jarylqasynuly, Seıdýlla Moldahanov jáne ataqty reseılik akter Sergeı Garmash sekildi tanymal akterler kúresedi. Basty róldi somdaǵan Seıdýlla Moldahanov túrli kınofestıvalderde úsh marapatqa ıe boldy, al Akbarovtyń ózi qazan aıynyń basynda XV Tashkent halyqaralyq kınofestıvalinde «Úzdik debıýt» júldesine ıe boldy.
Týyndy Aqmola jáne Qostanaı oblystarynda túsirilgen. Bıýdjeti shamamen 180 mıllıon teńge. Fılm kelesi jyly prokatqa shyǵady dep josparlanǵan.
Al 14 jeltoqsan kúni keshke festıval qonaqtaryn taǵy eki qazaqstandyq premera – Dáýletjan Mahmuttyń «Globýs» jáne Narıman Týrebaevtyń «Ol shaınekti satyp aldy» fılmderi jáne Aısultan Seıitovtyń «Qash» fılminiń arnaıy kórsetilimi kútedi.
Festıval dástúrli túrde Tanaris Production jáne A-Team kınokompanııalarymen Almaty qalasy ákimdiginiń jáne QR Mádenıet jáne aqparat mınıstrliginiń qoldaýymen uıymdastyrylady.
Festıvaldiń aqparattyq seriktesteri: «Qazaqstan», «Habar», «24 KZ», «El arna», «Jibek Joly», «Silk Way», «Silk Way Cinema», «Almaty tv», «Alatau tv» telearnalary, «Eldoradıo» jáne «Narodnoe radıo» radıostantsııalary, «Egemen Qazaqstan», «Kazahstanskaıa pravda», «Antenna Kazahstan» basylymdary, «Vremıa», «Baq.kz», «Kazinform», «365 info», «Orda.kz», «Global.news.kz», «Qaz365.kz» portaldary, «Qazcontent» medıakompanııasy, JAS ÓNER jýrnaly jáne PRO Production saıty.
