«Bastaý» kınofestıvaline stýdentterdiń 320 týyndysy usynyldy
ALMATY. QazAqparat - Almatyda ótip jatqan halyqaralyq «Bastaý» stýdenttik kınofestıvaline 320 jumys kelip túsken, dep habarlaıdy QazAqparat tilshisi.
Osymen 7 jyl qatarynan ótkizilip otyrǵan festıvalge álemniń túkpir-túkpirinen jas kınematografıster eńbekterin joldaǵan.
Belgili rejısser Ádilhan Erjanov, kınotanýshy Inna Smaılova, rejısser Azat Hakımov, kınotanýshy Baýbek Nógerbek syndy kınosynshylardan turatyn irikteý komıssııasy Reseı, Grýzııa, Ýkraına, Izraıl, Túrkııa, Germanııa, Ispanııa, Shveıtsarııa, Koreıa, Belarýs, Ortalyq Azııa men Qazaqstannan kelgen 47 jumysty konkýrstyq baǵdarlamaǵa ótkizdi.
Endi bul kınolardyń úzdigin kınorejısser, pedagog Iraklıı Kvırıkadze bastaǵan halyqaralyq qazylar alqasy anyqtaıtyn bolady.
Qazylar alqasy quramynda montajdaýkshy rejısseri Sılvan Kýtandın («Stalınge syılyq», «Dalanyń úni»), reseı ártisi Elvıra Bolgova («Meniń armıandyq úılený toıym», «Bótenniń qyzy»), qyrǵyz rejısseri Temirbek Birnazarov pen otandyq rejısser Sábıt Qurmanbekov bar.
Sonymen qatar, úzdik fılmderdi stýdentterden quralǵan qazylar alqasy da irikteıtin bolady.
«Álemde festıval kóp. Biraq, «Bastaý» shynymen de jaqsy bastaý alýǵa múmkindik beretin konkýrs. Oskar, Kann festıvaline barar alǵashqy saty retinde osyndaı baıqaý kerek. Eń aldymen stýdentterdiń jumystarynda biliktilik talap etiledi, máseleni basqa qyrynan ashýy kerek. Jas kınematografısterge osyndaı jol ashýǵa múmkindik bar», - dedi stýdentterden quralǵan qazylar alqasynyń tóraǵasy, ıspandyq rejısser ıAgo Mateo Velasko.
Sonymen qatar, konkýrs aıasynda qazylar alqasynyń músheleri men qonaqtary arnaıy sheberlik sabaqtaryn ótkizetin bolady.
«Stýdentter alǵashqy sátten-aq básekeni sezinýi tıis. Basqa eldegi zamandastar ne oılaıdy? Qalaı túsirip jatyr? Sony bilý mańyzdy. Jastardyń kınoáleminde top jarýy qıyn bolǵanyna qaramastan, kıno damyp keledi. Ol - ujymdyq jumystyń ónimi. Kıno tili ámbebap», - dedi festıvaldiń prezıdenti Sergeı Ázimov.
