«Bastaý» kınofestıvaline álem elderinen 130-dan astam týyndy jiberildi

Bul týraly búgin Almatyda ótken baspasóz máslıhaty barysynda festıvaldiń bas dırektory Sergeı Ázimov málim etti.

«Bul erekshe festıval. Ol oqý úderisine barynsha jaqyndatylǵan. Festıval sheńberinde Eýrazııa kıno mektepteriniń Qaýymdastyǵy qurylǵan. Onyń quramynda Búkilreseılik memlekettik kınematografııa ınstıtýty, sondaı-aq Eýropa jáne Azııa elderiniń belgili joǵary oqý oryndary bar. Bul qazaqstandyq jastarǵa stýdentter almasý júıesi boıynsha osy elderde bilim alýlaryna múmkindik beredi», - dedi S. Ázimov.

Ol sonymen qatar, festıvaldiń basty qaharmandary - stýdentter ekendigin jetkizdi.

«Іrikteý barysynda kóp jumys atqaryldy. Álemniń 30-ǵa tarta elderindegi kıno mektepteriniń stýdentteri bizge 130-dan astam derekti jáne kórkem fılmder jiberdi. Bıyl biz mynadaı bastama kóterdik. Jeńimpazdarǵa bir mıllıon teńgeden eki grant beriledi. Bul olarǵa kıno túsirýge jáne olardy kelesi festıvalde kórsetýge múmkindik beredi. Baıqaýǵa kınematografııa salasyndaǵy joǵary oqý oryndarynyń stýdentteri men jáı kınoáýesqoılar da qatysa alady. Óıtkeni «Bastaý» - qashanda jańa kózqaras pen shyǵarmashylyq erkindiktiń bastaýy bolýy tıis», - dedi festıvaldiń bas dırektory.

Naqtylaı ketelik, kınofestıvalge Qazaqstannyń 18 jas pen 35 jas aralyǵyndaǵy azamattary qatysa alady. Jobalar dramatýrgııa, vızýaldy sheberlik jáne stsenarııdegi kóterilgen taqyryptyń ózektiligi boıynsha baǵalanady.

Aldaǵy festıvaldiń bes kúninde, ıaǵnı 20-25 qazan aralyǵynda túrli fılmder kórsetilip, kınomektepterdiń tusaýy kesiledi. Túrli dóńgelek ústelder uıymdastyrylyp, tanymal kınematografısterdiń qatysýymen sheberlik synyptary ótkiziledi.

Esterińizge sala keteıik, «Bastaý» - túrli janrlardaǵy qysqa metrajdy fılmder saıysy. Kınofestıvaldi T. Júrgenov atyndaǵy ulttyq óner akademııasy Almaty qalasy ákimdiginiń qoldaýymen uıymdastyryp otyr.

Onyń ashylý jáne jabylý rásimi «Alataý» kınokontsert zalynda ótedi.