«Bastaý» halyqaralyq stýdenttik fılmder festıvaline ótinimder qabyldanýda
ASTANA. QazAqparat - Almatyda bıylǵy qarashanyń 5-8 kúnderi aralyǵynda «Bastaý» VII halyqaralyq stýdenttik fılmder men kınomektepter festıvali ótedi, dep habarlaıdy QazAqparat tilshisi.
Jyl saıynǵy festıval Sh.Aımanov atyndaǵy «Qazaqfılm» kınostýdııasynyń qoldaýymen Almaty qalasy ákimdiginiń, «Bastaý» halyqaralyq kınofestıvali dırektsııasynyń («Tanarıs Prodakshn kınokompanııasy» JShS), T.Júrgenov atyndaǵy Qazaq ulttyq óner akademııasy men «Turan» ýnıversıtetiniń uıymdastyrýymen ótkiziledi.
«Bastaý» VII halyqaralyq kınofestıvaliniń uıymdastyrý komıteti konkýrstyq baǵdarlamalarǵa usynymdar qabyldaý bastaǵanyn jarııalaıdy. Іrikteýge Eýropa, Azııa jáne Amerıkanyń 2017-2018 jyldary shyǵarylǵan debıýttik jáne stýdenttik qysqametrajdy fılmder (kórkem, derekti, anımatsııalyq) qabyldanady. Fılmniń uzaqtyǵy - 7 mınýttan bastap 40 mınýtqa deıin (anımatsııalyq fılmderden basqa)», - delingen kınofestıvaldiń baspasóz qyzmeti taratqan aqparatta.
Ótinimder 2018 jyldyń 25 qazanyna deıin qabyldanady.
Tolyq aqparatty festıval saıtynan tabýǵa bolady. Festıvaldiń resmı tilderi: qazaq, orys, aǵylshyn. Basqa tilderde usynylǵan fılmderdi orys ne aǵylshyn tilderinde sýbtıtrlarmen jiberý qajet.
«Festıval halyqaralyq yntymaqtastyqty damytý, mádenı almasý men jas kınematografıster arasyndaǵy baılanysty ornatý, sondaı-aq Eýropa, Azııa jáne Amerıka kınomektepteriniń stýdentteri men ustazdar quramyn jaqyndatý maqsatynda uıymdastyrylady. Shara aıasynda Eýropa, Azııa jáne Amerıkanyń beldi kınematografısteriniń qatysýymen sheberlik sabaqtar, qazaqstandyq jáne sheteldik kompanııalarmen birlesken jobalardy iske asyrý jónindegi dóńgelek ústelder ótkizý josparlanyp otyr», - delingen habarlamada.
