«Bastaý Bıznes» jobasynyń nátıjesi qandaı
ASTANA. QazAqparat - «Atameken» ulttyq kásipkerler palatasy «Bastaý Bıznes» jobasynyń nátıjesin jarııalady. Atalǵan joba aıasynda adamdardy bızneske úıretý sharalary atqarylady, dep habarlaıdy QazAqparat tilshisi.
Bıznes kommýnıkatsııalardy memlekettik tilde damytý departamentiniń dırektory Baýyrjan Orazǵalıevtiń aıtýynsha, ótken jyly arnaıy oqytý kýrstarynan ótken azamattardyń 20 protsenti óz kásibin ashty.
«Bıyl atalǵan bastamanyń aýqymy keńeıdi. Endi, 80 aýdannyń ornyna 160 aýdandy qamtımyz. Budan bólek, 14 oblys ortalyǵy men 27 monoqalada oqytý sharalaryn uıymdastyramyz. Sebebi «Bastaý Bızneske» suranys bar. Jalpy, aǵymdaǵy jyly 30 myń adamdy oqytyp, kem degende, 6 myń adamǵa bıznes ashýǵa jaǵdaı jasaımyz», - dedi B.Orazǵalıev Úkimet úıinde ótken baspasóz máslıhatynda.
Onyń sózine qaraǵanda, «Bastaý Bıznes» qatysatyn adam bir aı boıy kásipkerliktiń qyr-syryn meńgeredi. Kúnde túske deıin tórt saǵattyq teorııalyq sabaqtar ótedi. Al tústen keıin praktıkalyq sharalar uıymdastyrylady. Sol kezde qatysýshylar tájirıbeli mamandardan keńes alyp, ózderiniń bıznes-jobalaryn ázirleıdi.
«Bir jyldyń ishinde biz biraz máselelerdi anyqtadyq. Máselen, aýdandardyń mamandandyrý kartalary kóp jaǵdaıda shartty túrde jasalǵan. Atalǵan qujattardy áli de jetildirý kerek. Sol sebepti bıyldan bastap biz árbir jobany óńirdiń ekonomıkalyq ómirine barynsha beıimdeýge kúsh salamyz. Sonyń arqasynda bıznestiń ómirsheńdigi artady. «Atamekenniń» aýdandyq palatalary da óz kómegin berip otyrady», - dep atap kórsetti B.Orazǵalıev.
